Shillong, Risaw 20
U Nishad Kumar u la lah ban pynpaw ïa ka jingtbit ha ka Asian Para Games 2026, hadien ba u la lah ban khur ïa ka takma ksiar kaba ar ka jong u bad ban long uba lai napdeng ki nongïalehkai ka ri ban khur haduh ar ki takma ksiar ha kane ka lympung kaba dangïaid ha Aichi-Nagoya, Japan.
Une u rangïalehkai uba la khur takma rupa ar sien ha ka Paralympic da kaba khur ïa ka nam jop ha ka T47 ha ki 2.04m ha Aichi-Nagoya, kaba long shisngi hadien ba u la khur ïa ka ksiar ha ka long jump T47 jong ki shynrang da kaba u la lah ban kynthih 7.11m.
Kane ka jingkhur ïa ki ar tylli ki takma ksiar ka la pynlong ïa u Nishad ban don lang ha ka elite club kaba kynthup lang ïa u Ankur Dhama bad ka nongsiat khnam ka bym don kti ka Sheetal Devi, kiba la ïoh khur ar tylli ki takma ksiar ha ka Asian Para Games 2023 ha Hangzhou, China.
U Dhama u la khur ïa ka takma ksiar ha ka 5000m T11 bad 1500m T11 jong ki shynrang, katba ka Sheetal ka la khur ïa ka takma ksiar ha ka individual compound open jong ki kynthei bad ka mixed team compound open.
Kumba ka long mynta ka India ka la khur 30 tylli ki takma, kynthup ïa 7 tylli ki takma ksiar, 10 ki takma rupa lem bad 13 ki takma rnong.
U Pranav Soorma u la khur ïa ka takma ksiar ha ka discus throw F51/52/53 jong ki shynrang, ha kaba u la lah ban kamai 932 poiñ na ka bynta ban thaw ïa ka rekod kaba thymmai ha kane ka lympung halor ka jinglah ban kawang 11.66 mitar ha ka F51, katba u Ram Ratan Singh u la khur ïa ka takma rupa da kaba kawang 10.35 mitar bad kamai 809 poiñ ha kane kajuh ka jingïakop.
Ha ka Women’s 200m T12 final, ka Simran ka la khur ïa ka takma ksiar da kaba pyndep ha ki 24.80 sekhon na ka bynta ban thaw ïa ka rekod kaba thymmai ha kane ka lympung. Ka Tejalben Damor ka la khur ïa ka takma rnong da kaba pyndep ha ki 25.23 sekhon ha kajuh ka jingïakop.
Ha Deepthi Jeevanji ka la khur ïa ka takma ksiar ha ka 400-metre T20, na ka bynta ban thaw ïa ka rekod kaba thymmai ha kane ka lympung da kaba ka la lah ban pyndep ha ki 56.36 sekhon.
Ha ka Powerlifting, u Ashok u la khur ïa ka takma rupa ha ka 65kg da kaba u la lah ban rah 192 kilogram. U nongsiat suloi jong ka ri u Manish Narwal u la khur ïa ka takma rupa ha ka 10-metre air pistol SH1, ha kaba u la kamai 233.7 poiñ. Ka Shrishti Arora ka la khur ïa ka takma rnong ha ka 10-metre air pistol SH1.
Ha ka jingïakop kawang sum ne javelin throw, u Pradeep Kumar u la khur ïa ka takma rupa da kaba u la lah ban kawang 27.45 mitar, katba u Ayush Verma u la khur ïa ka takma rnong da kaba kawang ha ki 17.88 mitar.
U nongjngi jong ka ri u Himanshu Nandal u la khur ïa ka takma rnong ha ka 400-metre freestyle S11, da kaba u la lah ban pyndep ha ki 5 minit bad 10.91 sekhon.
