Shillong, Risaw 25
Ka kynhun ïalehkai phutbol shynrang FIFA U15 jong ka ri India ka la ïoh ban pynskhem ïa ka jingjop ba ar jong ka hapoh ka inaugural FIFA U15 World Cup & Festival 2026, da kaba pynliem ïa ka Cameroon 2-1kol hapoh ka jingïalehkai jong ka Group K ha Baku haak 25 Risaw 2026.
Ka India ka la ïoh ban pynkiew da ka shikol ha ka minit ba nyngkong da ka jingbakla lyngba u nongïalehkai ka Cameroon, Fareil Ngobo, ha kaba u thmu ban pynlait ïa ka corner kick u Deepak Singh Arambam hynrei u la kum pyndei da ka khlieh sah ka kol lajong. Hynrei ka Cameroon ka la pynïaryngkat biang ïa ka kol ha ka minit ba 20 da ka own goal na u Muhammad Sohil Khan ka India.
Ka India ka la ïoh pynphai biang ban thep sa kawei ka kol ha ka minit ba 27, lyngba u captain R Lalremruatfela da kaba bol ba pashat na u Deepak.
U ‘rangapkol Jenit Ningthoujam u la leh bha borabor ban pynskhem ïa kane ka jingjop, da kaba ïakhun pynlait ia baroh ki jingpyrshang thep kol khamtam na ka penalty kick lyngba u Harouna Abdoulaye ha ka minit ba 32 kaba wan lyngba ka handball.
Ka India ha ki minit ba khatduh ka la lah ban khur ïa ki 3 poiñ. Ka Inida kan sa ïakahun pyrshah sa ïa ka Grenada.
