Khargone, Risaw:
Katkum ki khubor, la iathuh ba la ioh tam ia 343 tylli ki card vote ‘Epic’ kiba pher halor ka wah Narmada jong ka nongbah Mandleshwar kaba don hapoh ka distrik Khargone jong ka jylla Madhya Pradesh ha ka Sngi U Blei, hadien kane ka liangpyrshah ka Congress ka la dawa da ka FIR bad ka jingtohkit kaba shai halor kitei ki card thep vote ba la paw pyrthei ha kane ka kynti bad kiba la sngewthuh ruh ba ka long ka jingleh thok jong kano- kano ka seng ban ioh ban khur ia ki vote jong kitei ki paidbah kiba la shu pynshna card thok.
Ka jingtip ba nyngkong ka pyni ba kitei ki card ki dei jong ka thaiñ Rau ha ka nongbah Indore kaba marjan.
Ki nongshong shnong ki la ioh tam ia ki card ha ka por ba pynkhuid ia ka rud wah bad ki la pyntip sha ki bor pyniaid. Hadien katto- katne por ba ki la dep ban tam bad pynkhuid ia katei ka wah, ka video kaba pyni ia ki kard ba la ioh biang ka la saphriang bha ha ki social media.
U President ka District Congress, u Ravi Naik, ryngkat bad ki nongtrei jong ka seng jong u, u la leit sha thanat Mandleshwar bad u la mudui da ka ejahar pyrshah ia kito ki nongleh ia katei ka kam be-aiñ kaba la paw pylleiñ ha kane ka kynti.
U Naik u la buh jingkylli ia ka jingtreikam jong ka Election Commission bad u la dawa ban leh eiei pyrshah ia kiba donkti ha katei ka kam thok- kam shukor.
Ka Congress ka la wad ruh ia ka jingtalasi ha katei ka wah lyngba ki nongleit jngi ban wad shuh shuh ia ki ID jong ki nongthep vote.
“Ka Congress kan gherao ia ka thanat lada ym shym la register ia ka FIR,” la maham u Naik.
Ka ophisar pulit jong ka Mandleshwar Sub-Divisional ka Shweta Shukla ka la iathuh ba ia kine ki kot ki sla jong ki nongthep vote la lap ha ka por ba pynlong ia ka jingpynkhuid shnong ha shilynter ka wah Narmada.
Ka kynhun khajna ka la kurup ia kitei ki card, bad la bthah ia u nongpeit ia ka thanat ban tohkit ia katei ka kam. Ki pulit ki la ioh ruh ia ka jingujor na ka Congress, ka la bynrap.
