Jammu & Kashmir, Risaw:
Ka BJP ka la pynrem jur ïa u heh saiñ pyrthei ba la rim bha, u Farooq Abdullah bad ka la kynnoh ba kitei ki jingkren pynkulmar jingmut jong u Myntri Rangbah barim halor ki nong Kashmir, ki long ki jingkren kiba pynkhihwin bad ki long pynban kum ka jingai jingkyrshan ïa ka ri Pakistan.
U Abdullah, uba dei u khlieh jong ka seng National Conference (NC) ha Jammu & Kashmir, u la ong ba ka jingthmu jong ka sorkar India, ïa ki nong Kashmir, kam long kaba dei bad u la ai burom ïa ka jingtrei shitom jong ka Pakistan, ha ka liang ka kam saiñ pyrthei, kaba la iarap ïa ka sur jongki, ba kan iohsngew ha ka pyrthei baroh kawei.
Ka BJP ka la shimkhia mardor bad ka la pynrem ïa ki jingkren jong u- kum ka jingai jingkyrshan ïa ka Pakistan bad kiba long pyrshah ruh ïa ka burom jong ka ri. Don ki nongialam kiba la dawa wat ban ujor da ka mukotduma pyrshah ïa u Abdullah uba la pynmih ïa kum kitei ki kyntien kiba la pynkhihwin ïa ki paidbah nongshong shnong, kum u nongialam jongki.
Ka Congress, kaba dei ka paralok kaba kyrshan ïa ka sorkar jong ka seng ha J&K, ka ong ba u Abdullah, u lah ban pynpaw ïa la ka jong ka jingsngew shimet bad ba ka India, kan nym shah ïa ki bor ba nabar ban wan tuklar ha ki kam pohïing jongka.
Ka India ka pynskhem ba ka Jammu & Kashmir ka dei ka bynta kaba kongsan bad kaba ym lah ban phiah noh bad ka kynnoh ïa ka Pakistan ba ka pyrshang ban ai jingkyrshan ïa ki kam lehnoh bad ban wanrah ïa ka jingkulmar ha ki jaka jong ka Union.
Haba kren ha ka jingïalang jong ki nongtrei ha Baramullah ha katei ka sngi, u Farooq Abdullah u la kynnoh ba ki paidbah ka Jammu & Kashmir ki dang don ïa ka jingithuh namar ba ka Pakistan ka rah ïa ka mat jongki nong Kashmir ha ki jingialang bapher- bapher jong ka pyrthei.
