New Delhi, Risaw:
Ka skulbah Jamia Millia Islamia jong ka nongbah Delhi, ka la pynkynriah ïa ki klas online, hadien ba ki nongiakhih kiba la dawa ban pyntreikam biang ïa ka ilekshon ki samla pule ha katei ka jaka pule, ki la ïa tyngkhuh bad ki nongap pahara ha kane ka jingjia.
U heh jong katei ka skulbah ha Delhi, u la kynnoh ba ka jingleh jong ki arngut ki nongialam ka Congress, kiba la leit jngoh ïa katei ka skulbah, ha ka sngi ba la leit, ka la pyn bitar ïa ki samla pule jong katei ka skulbah bad pynlong ïa ki kum ki atiar na ka bynta ki kam saiñ pyrthei.
Kumta, la ong ba kitei ki samla pule nongïakhih ki la dawa, khamtam eh, ban pynioh biang ïa ka seng samla pule jong ka Jamia Millia Islamia (JMISU) kaba la shah pynduh noh ha u snem 2006 namar ka jingïakynad ha ki jaka pule kaba la wanrah ïa ka jingthut ha ka pule puthi.
U heh ka Jamia,
u Mahtab Alam Rizvi, u la kynnoh ba katei ka jingjia ka la jia shisngi hadien ba ki MP ka Congress, u Imran Pratapgarhi bad u Imran Masood, ki la rung tuh shapoh katei ka jaka pule, da kaba ki la ryngkoh nalor ka kynroh bad pynthut ïa ka sawdong sawkun jong ka jaka pule.
