Bengaluru, Risaw:
U Myntri Rangbah ka Karnataka, u DK Shivakumar, u la ong ha ka sngi Balang ba un sa wadlad ban ïakynduh ïa u Myntri Rangbahduh ka ri, u Narendra Modi, uba la khmih lynti ba un don ha Bengaluru ha ka 15 tarik Naiwieng, na ka bynta ban aiti ïa ka dorkhas sha u, kaba pan jingïarap na ka jingrang tyrkhong ha kane ka jylla.
La khmih lynti ba u Modi un don ha Bengaluru ban plie ïa ka laiñ thymmai jong ka Metro. Haba kren sha ki nongthoh khubor hangne, u Shivakumar u la ong ba ka sorkar jong u ka la kyntu ïa ka sorkar pdeng ban pynlong ïa ka jingïalang halor ka jingïarap na ka jingrang tyrkhong.
“U Myntri Rangbahduh u la khmih lynti ba un don ha Bengaluru ha ka 15 tarik u Naiwieng ban plie ïa ka Metro line, ngan sa pan por, u la dei ban leit sha Mysuru, hynrei u la pynkynriah noh namar ka Dasara. Ngan pan por bad u Myntri Rangbahduh ban ïakynduh ïa ka kynhun jong baroh ki seng ha ka por ba u wan sha Bengaluru”, u la ong.
U la ong ba ka sorkar jylla ka la pyllait ïa ka bai lutksan sha ki distrik kiba la shah ktah ha ka jingrang tyrkhong.
Ka jingpeit bniah ïa ki nongïoh jingmyntoi ka dang ïaid. Shisien ba la dep, yn pynpoi ïa ka bai lutksan sha ki Bank Account jong ki nongïoh jingmyntoi, u la bynrap. Halor ka jingkylli la ka sorkar jylla ka don ne em ka jingpyrshah ïa ka thup kyrteng thep vote ba khatduh ba la pynmih da ka Election Commission, u la ong ba ka Commission ka la pdiang ïa ka jingpyrshah jong ka ha kaba ïadei bad ka Form 7.
