Aizawl, Naiwieng:
Kumba la khmih bniah, la ong ba na ki briew kiba la ïap katkum ka jingai jingtip jong ki doktor ha Mizoram ha u snem 2025, ki bun tam ki dei kiba ïoh ïa ka jingpang ring bad pynhiar mynsiem, ha kaba ki la shim ïa 721 ngut ki mynsiem briew, kynthup ïa 268 ngut ki kynthei, ong ka kaiphod ba la pynmih da ka sorkar jylla.
Ka Medical Certification of Causes of Death (MCCD) Report, 2025, kaba la pynmih da ka Directorate of Economics and Statistics, ka la lap ba ki jingpang pynhiar mynsiem ki long 17.3 percent na baroh ki jingïap ba la pynshisha da ki doktor ba la buh jingthoh hapoh u snem.
Ki jingpang na ka kpoh ki la mih kum ka daw kaba ar kaba khraw tam, kaba la pynlong ïa ka jingïap haduh 15 percent, bud sa ki jingpang ba thut ha ki rukom treikam jong ka met baroh kawei da 13.7 percent.
Ki jingpang ba saphriang bad ki khñiang jingpang ki long 12.2 percent na ki jingïap ba la pynshisha da ki doktor, katba ka jingpang cancer, kaba la kheiñ kum ki jingpang ba thymmai ha ka kaiphod, ka la shim ïa ka jingim jong kumba 11 percent.
Ïa kane ka kaiphod la pyllait paidbah da u Chief Registrar of Births and Deaths-cum-Commissioner bad u Secretary u Vanlaldina Fanai ha ka prokram ba la pynlong da ka Directorate of Economics and Statistics.
Ka Mizoram, ka don 4,146 ngut kiba ïap ha u snem 2025, kaba la hiar na ka 4,329 ngut ha u snem 2024, kaba pyni ïa ka jinghiar jong ki nongpang, da 183ngut.
Napdeng ki District, ka Aizawl, ka dei kaba bun eh kiba ïap, kiba la pynshisha da ki doktor, ha kaba ki long 2,664 ngut. Buddien ka Lunglei da 350 ngut kiba ïap, katba ka Kolasib ka la don 282 ngut.
Ka kaiphod ka ai ïa ka jingpynkylla ïa ki jingïap katkum ka daw katkum ka jingpynshisha jong ki doktor, kaba ai ïa ka jingpeit bniah ïa ki jinglong jingman ba kongsan jong ka koit ka khiah kiba ïadei bad ki jingïap ha ka jylla.
