Aizawl, Naiwieng:
Ki Pulit ka Mizoram ki la kurup ïa ki drok kiba shongdor T. 77.15 klur tyngka bad ki la kem ïa 29 ngut ki briew, ba kynthup ïa 6 ngut ki nong Myanmar, ha ki 29 tylli ki mukotduma ba la mudui ha kylleng ka jylla ha u Nailur, kaba pynpaw ïa ka jingeh kaba ïai bteng jong ka jingkhaïi drok ha kane ka thaiñ.
Katkum ka kyrwoh ba la pyllait da ki pulit ka jylla ha ka taïew ba la lah, la ong ba kitei ki jingïoh kurup ki kynthup ïa 78.746 kg u drok Methamphetamine uba shongdor T.62.99 klur, 8.112 Kg u drok Morphine uba shongdor T.8.11 klur bad 2.922 Kg u drok Heroin uba shongdor T. 5.84 klur.
Ki pulit ki la ïoh ruh ban kurup 3.7 kg u opium uba la antad ba u shong dor T.18.5 lak bad 4.22 kg u ganja uba shongdor T.2.11 lak.
Ka Champai distrik, ka la paw ba ka dei ka distrik ba la ïoh kurup bun tam u drok, ha kaba ki pulit, ki la ïoh ban kurup ïa 25.646 kg u drok Methamphetamine. Ar tylli ki jingjia ha Saitual distrik ki la pynlong ban kurup ïa u juh u drok uba khia 18.194 kg bad 12.746 kg, ong ka kyrwoh.
Ha kawei pat ka jingjia, ki pulit ki la ïoh ban kurup 8.946 Kg u drok Methamphetamine, 3.087 Kg u drok Morphine bad 50 gram u drok Heroin.
Kiwei pat ki jingïoh kurup ba kongsan ki kynthup ïa 3.7 kg u drok opium ha Champhai distrik, 1.618 kg u drok ha Kolasib bad 4.22 kg u ganja ha Lawngtlai.
Kiba shah kynnoh kiba la shah kem ha kaba ïadei bad kitei ki kam ki kynthup ïa ki nong India bad ki nongwei, ha kaba katto katne la ithuh ba ki dei ki nongshong shnong jong ka Manipur bad Myanmar.
Ki pulit jong ka Mizoram ki la ong ba kane ka jingïoh kurup ka pyni ïa ka jingpyrshang kaba dang ïaid shakhmat ban tehlakam ïa ka jingkhaïi drok bad ka jingsaphriang jong ki drok ha ka jylla. Hynrei ka tnad ka la ban jur ïa ka jingdonkam ban bteng ïa ka jingïatreilang jong ki paidbah ban pynkhlaiñ ïa ki jingpyrshang ban pyntreikam.
Ki pulit ki la kyrpad ïa ki paidbah nongshong shnong ba kin ïasam ïa ki jingtip halor ki jingsuba khaïi drok bad ka pynïaid ïa u drok bad ka sorkar, ki shnong, ka Young Mizo Association (YMA) bad ki seng treimon sngewbha.
Ka tnad ka la pynpaw biang ba ka jingïatreilang hapdeng ki bor pynjari aiñ bad ki nongshong shnong ka dang long kaba kongsan ha kaba ïaleh pyrshah ïa ka jingma jong u drok.
