Guwahati, Naiwieng:
Ka jingpynthymmai jong ka jingpyntreikam jong ka Assam pyrshah ïa ka jingshongkha khynnah ka la pynlong ïa ki 63 ngut ba kin shah set patok ha ka distrik Dhubri, kaba dei ka jingkheiñ kaba heh tam ha ka jingpyntreikam ha ka distrik.
Ki pulit ki la pynlong ïa ki jingkem briew ha kylleng ki khyndai tylli ki thanat ha Dhubri hadien ka jingbthah jong u Myntri Rangbah ka jylla u Himanta Biswa Sarma. La ïathuh ba kiba shah kem ki kynthup ïa ki briew kiba shah kynnoh ba ki donkti ha ki jingshongkha khynnah, ryngkat bad ki kmie ki kpa bad ki nongsumar.
U Dhubri Sadar, u dei uba bun eh ki jingshah kem hapoh ka distrik, ha kaba ki don 18 ngut ki briew kiba la shah kem. Ka Golakganj ka la bud da ki jingshah kem jong ki 15 ngut, katba ha Bilasipara ki la don 9 ngut kiba la shah kem.
Ki pulit jong ka Gauripur ki la pyntip ba ki don 8 ngut kiba la shah kem. Ka Chapar bad ka Fakirganj, ki la rekod mar 5 ngut, katba arngut ki briew, la kem ha Tamarhat bad uwei ha Agomoni.
Ka jingleh ha Dhubri ka dei shi bynta jong ka jingïakhih kaba kham heh ha ka jylla baroh kawei ban pyrshah ïa ka jingshongkha khynnah. U Myntri Rangbah u la pyntip ba ki pulit ki la kem ïa ki 524 ngut ki briew bad ki la buh jingmudui ïa 441 ngut kiwei pat.
Ha ka 28 tarik u Risaw, u Sarma u la pynpaw biang ba kane ka jingpyntreikam kan ïai bteng haduh ban da pynduh noh ïa ka jingshongkha khynnah ha Assam. U la pyni ruh ba ki lah ban don shuh shuh ki jingshah kem katba nang ïaid ka jingkhynra.
Ka sorkar jylla ka la ong ba katei ka jingpynshitom kan ktah ïa ki briew shimet kiba la kynnoh ba ki donkti ha kaba pynsuk ïa ka jingshongkha khynnah, ryngkat bad kiwei pat kiba la suba ba ki donkti ha kane ka kam.
