New Delhi, Naiwieng:
Ka Election Commission of India (ECI) ka la pynshai ba ki nongthep vote kiba jah kyrteng na ki Draft Electoral Roll ba la pynmih ha kane ka Special Intensive Revision (SIR) kaba dang ïaid shakhmat, ki lah ban aplai ban pynrung thymmai lyngba ka Form 6, wat lada ki dei ki nongthep vote kiba la dep pynrung kyrteng kham mynshwa.
Ha ka shithi ba la thoh ha ka 3 tarik u Naiwieng, sha ki heh ophisar elekshon jong baroh ki jylla bad ki Union Territories (UT), ka komishon ka la ong ba ka jingai ïa ka phorm 6 ha kum kine ki khep kan ym long, dalade hi, ka ba long kum ka jingpynbna lamler ne khot ban pynngat ha ki kyndon aiñ katkum ka kyndon 31 jong ka Representation of the People Act, 1950.
Ka jingpynshai ka pynbeit ïa ki jingeh hapdeng ki nongthep vote kiba la pynrung kyrteng mynshuwa kiba la shah iehnoh ha ka thup kyrteng thep vote bad kiba la artatien ban apply lyngba ka phorm 6 namar ba ka phorm ka kit ïa ka jingpynbna ba u nongthep vote u wad ban rung ha ka thup thep vote ha ka sien kaba nyngkong.
Ka EC ka la kam ba kum kine ki nongthep vote ki tieng ba ka jingpynrung kyrteng kham kloi jong ki ka lah ban pynlong ïa ka jingpynbna kaba bakla bad pynlong ïa ki ban shah pynngat ha ka aiñ.
“La pynshai ba u nongjied uba ka kyrteng jong u kam paw ha ka Draft Electoral Roll u lah ban ai ïa ka phorm 6 ban pan jingpynrung ha ka thup nongjied ba khatduh, katkum ka rukom treikam ba la buh,” la ong ka shithi.
Ka komishon ka la bynrap ba ki nongthep vote kiba la jah na ka thup kyrteng jong ki nongthep vote ki dei ban wad jingpynrung thymmai, “khlem da kheiñ la u nongthep vote u la shah pynrung kyrteng mynshuwa ne em”.
Ka la bthah ruh ba ym dei ban sdang ïa kano kano ka kam katkum ka kyndon 31 da u ophisar pynrung kyrteng elekshon tang namar ba la pynrung ïa u nongaplai ha ka thup nongthep vote kaba kham mynshwa bad hadien kata u la aiti ïa ka phorm 6 ha ka por ne hadien ba la dep pyntreikam ïa ka SIR.
Ka jingïada ka long katkum ka kyndon ba u nongaplai um pat shah pynrung kyrteng ha kawei pat ka Parliamentary ne Assembly Constituency bad ba ka jingpynbna ka long lym kumta katkum ka aiñ.
Kane ka jingpynshai ka wan hapdeng ka jingkynthoh kaba kham heh halor ka jingpyndonkam ïa ka SIR bad ka jingsngewkhia halor ka jingpyndonkam ïa ka Form 6 ban wanrah biang ïa ki nongthep vote kiba la weng noh ïa ki kyrteng jong ki na ki Draft Roll.
Ka Congress ha ka sngi Ba-ar ka la kyntait ïa ka jingpynshai jong ka EC kum ka “jingïakren kai”, da kaba kynthoh ba kam shym la pynbeit ïa kaei kaba ka seng ka la batai kum ki jingduna ba kongsan jong ka jingpynkylla ïa ka aiñ. Ka seng ka la kynnoh ba ïa ka rukom pyntreikam ha ka SIR la shna khnang ban kyntait ïa ki nongthep vote.
Ka jingïakynad halor ka Form 6 ka la wanrah ruh ïa ka jingpyrshah napoh ka tnad elekshon.
Kumba la ïathuh da ka khubor la ong ba u Election Commissioner u Sukhbir Singh Sandhu bad u Vivek Joshi kham mynshwa ki la buh jingkylli halor ka jingpynrung bynrap ïa ka jingpynbna kaba ïadei bad ka SIR ha ka aplikeshon online Form 6. Ki la kynthoh ba ki jingkylla ha ka dur jong ka aiñ ki donkam ïa ka jingpynkylla kaba pura bad ym lah ban leh marwei da ka Commission.
