Mawkyrwat, Naiwieng 10
Ka Mawkyrwat District Sports Association ( MDSA) ha ryngkat ka jingïatreilang bad ka ophis u District Sports Officer ka South West Khasi Hills District, ha ka sngi Ba-ar ka la plie ïa ka samoi ïalehkai phutbol ba tip kum ka Super & First Division League 2026-27 ha madan MDSA Artificial Turf, Nonglang.
Ha kane ka lympung ïalehkai Super Division ki don 8 tylli ki kynhun kiba wan ïashim bynta, katba ha ka First Division pat ki don 13 tylli.
Ha kane ka sngi sdang jong kane ka lympung, ka jingïalehkai ha ka First Division ka la long hapdeng ka Rangjadong SC pyrshah ïa ka Mawthong SC ha kaba ka Mawthong ka la khur ïa jingjop da 2-1 kol.
Ïa kine ki kol jong ka Mawthong la ïoh ban thep da u Pyndap L Mawlot ha ka minit kaba 17 bad u Samfilstar Wanñiang ha ka minit kaba 59.
Haba phai pat sha ka Super Division, ka Mawlangwir SC kaba dei ka kynhun kaba dang shu kiew kyrdan sha ka Super Division, ka la pynjem khnap ïa ka Mawten SC, kaba la bat bat lai snem kynthih ïa ka nam lahduh, da 3-0 kol.
Ïa kine ki kol la thep da u Milford Wanñiang ha ka minit kaba 24, kumjuh u Arrowstar Wanñiang ha ka minit kaba 32 bad u Lastbornson Marweiñ ha ka minit ba 45 jong ka kylla step.
Ïa kane ka lympung la plie da u Bah Carness Sohshang, MDC barim ka Mawkyrwat uba bat ruh ïa ka kam kum u Co-Chairman ka Meghalaya State Development Reform Commission, kum u kongsan. Kiwei pat kiba la don lang ki long u Bah Y.G Lyngdoh, Working President ka MDSA, Bah Lying Lyngdoh, Bah Khrawkupar Shangdiar, Bah Synshar Lyngkhoi bad bad kiwei kiwei.
