Washington, Naiwieng:
U Myntri ka tnat iada ri jong ka US, u Pete Hegseth, u dang don hapoh ka jingpynbor kaba jur, hadien ba ki nongialam ka Democrats kiba la ioh khur ïa ka jingjop ha ka ilekshon shiteng samoi, ki thmu ban thom ïa u ha ka Congress bad ïa ki Republican, ha kaba, ki kynnoh ba dei ka thma Iran kaba u ialeh pyrshah, kaba la wanrah ïa ka jingshah rem jongki ha kane ka ilekshon.
U Hegseth, uba dei u nongiarap barim jong ka Fox News bad u ophisar jong ka National Guard, u la lait im na ki jingshah kynthoh ba la ju jia man ka por, naduh ba u la shimti ïa ka kam ha kaba sdang jong u snem 2025, hynrei ka por jongu, ka lah ban kut noh.
U President Donald Trump, u la ieng ha ka liang jong u Hegseth, haduh mynta, da kaba ban jur ba “u leh ïa ka kam kaba bha shibun” haba la kylli ïa u, hato un bujli ne em ïa u heh jong ka Pentagon.
“Ngi la don shibun ki heh shipai. Baroh ki dei ki heh shipai kiba saw khlur. Ngam pat ju iohi ïa kaba kum kata. Bad bun na kita ki briew ki la kyndit. Ngam sngewtynnad ïa u heh shipai uba la kyndit. Bad kumta, u lah ban don ka jingpyrshah,” la ong u President ka US.
“Ka Venezuela ka la long kaba ym lah ban ngeit … bad ha Iran, ngi don hangtei la hynriew bnai bad ngi synshar ïa baroh kaba ngi la kwah ban synshar,” u la bynrap.
Hynrei u Trump bad u Vice President u JD Vance baroh arngut ki la kynnoh ïa ka thma Iran, ha kaba u Hegseth u dei u nongiasaid aiñ bad nongkren ba kongsan, na ka bynta ka jingshah rem ha ka ilskshon shiteng samoi dang shen.
Ki Democrat kiba pyrshah ki la jop ïa ka jingbun paid ha baroh ar tylli ki ïing dorbar jong ka Congress ha kane ka taiew, kaba la ai bor ïa ki ban sdang ïa ki jingtohkit bad ruh ban khanglad ïa ka jingai pisa na ka bynta ka tnat ïada ri bad ka thma Iran.
Ka jingialeh, kaba la pynlong ïa ka Iran ban khanglad shi bynta ïa ka lynti um kaba kongsan jong ka Strait of Hormuz, ka la pynjulor ïa ka ioh ka kot jong ka pyrthei. Ka jingkiew dor kaba la mih na kane, khamtam eh jong ka bor ding, ka la pynbitar ïa ki nongthep vote jong ka US.
“Ka daw ba ngi la rem, ka dei ka thma”, la ong u Vance, katba u Trump, u la ong, ba ka long kaba shisha shibun, ba ka jingialeh, ka la pynlong ïa ngi ban rem ha ka .
