Poland, Naiwieng:
Katkum ki khubor, la iathuh ba uwei u runar u la synreit kuli naphang napoh ka kali jong u, ha kaba, 6 ngut ki la duh ei noh ïa ka jingim bad 15 ngut kiba la mynsaw ha kane ka jingjia kaba la jia hapoh ka nongbah Krakow kaba don sha ka phang Shathie jong ka Poland ha ka Sngi Saitjain, la iathuh ki heh sorkar, shwa ba ki pulit kin siat bad kem noh syndon ïa utei u briew.
Kiba mynsaw ki kynthup ïa arngut ki pulit bad uwei na ki u la mynsaw jur, ha ka jingiasiat bad utei u runar, uba ki pulit ki la iathuh ba u phong da ki jaiñ “kiba long kum ki jaiñ phong shipai”, u don ki tiar shipai bad u la siat ïa ka madan bah jong ka nongbah.
Ki pulit jong ka Krakow ki la iathuh hapoh ka rynsan X ba u nongsiat suloi ba la shah kynnoh u dei u nongshong shnong jong ka Poland, da kaba bynrap: “Tang uwei uba la tip ba u la leh ïa katei ka jingjia u don ha kti jong ki pulit”. Kim shym la kdew ïa kano kano ka jingthmu jong kitei ki jingshah siat, kiba la shim ïa ka jingim jong 4 ngut ki kynthei bad 2 ngut ki shynrang.
Ki pulit ki la iathuh ba ki la sdang ban ioh jingtip ha ka por 3 p.m eiei. (1400 GMT) ba uwei u runar u la synreit kuli na ka kali bad u don bad u la ther kuli naphang sha ki ‘riew paidbah kiba don ha katei ka jaka paidbah hapoh ka nongbah kaba wan ba ar napdeng ki nongbah ba heh tam jong ka ri Poland, kaba long ruh ka jaka jngoh kai pyrthei kaba pawnam bha.
Ki dur bym lah pynshisha kiba la saphriang ha kylleng ki rynsan social media ki pyni ba ki briew ki la iaphet krad na katei ka jaka katba ka jingsawa ki ktang kuli bad ki sairen jong ki pulit katba ki pulit ki dang leit her sha katei ka jaka. Kawei pat ka video ka pyni ïa arngut ki briew kiba thiah lyngktar ha madan hapdeng ka snam kaba la tap ïa ka madan bad kaba la phlei na ka met jongki.
Ka Katarzyna Cislo, ka nongaiktien jong ki pulit jong katei ka thaiñ, ka la ong: “U nongsiat, u phong da ki jaiñ kiba long kum ki jaiñ phong shipai bad u la pyndonkam da ki tiar siat jong ki shipai hi. Shibun bah ki tiar siat kiba la lap na ka kali jong u ruh.”
