Kyiv, Naiwieng:
U President ka Ukraine, u Sngi Ba-ar, u la ïathuh ba ki drone bad ki namding jong ka Ukraine ki la siat ïa ka jingkieng ba kongsan jong ka nongbah Kerch kaba pynïasoh ïa ka Russia bad ka Crimea Peninsula ba la shah knieh noh bad kumta ruh u Zelensky u la ong ba kane ka long ka jingkhynra kaba bym pat ju jia mynno- mynno ruh ha kine ki por ba la dep namar ba ka Russia ka la pyntip ba ki shipai jongka ki la ioh ban siat pynhap ïa shibun tylli ki drone jong ka Ukraine ha katei ka miet.
U Zelenskyy u la ong ba kane ka jingleit thombor ïa katei ka jingkieng, ka long ka jingjop kaba khraw ïa ka Ukraine hadien ka jingpyrshang ba la neh da ki taiew jong ki shipai Ukraine ban pyntroiñ suki suki ïa ki jingïada suiñ jong ka Russia shwa ban bom ïa kane ka thong ba kordor da ki namding bad ki drone ha ka shi miet.
U Zelensky, um shym la batai bniah ïa ka jingjulor, hynrei u General Staff jong ka Ukraine, u iathuh ba ar tylli ki bynta jong katei ka jingkieng, ki la twa, kaba la pynjulor ïa ka jingpyniasoh ïa katei ka surok.
Ka committee tohkit jong ka Russia, kaba dei ka tnat tohkit ba ha khlieh duh jong ka ri, ka la ong ba katei ka jingkieng ka la shah thombor ha ki drone bad ka la shah pynjulor hynrei kam shym la batai bniah.
Ka jingkieng Kerch ka dei ka jingpyniasoh kaba kongsan ha kaba pynkit ïa ki mar shipai bad riew paidbah na Russia sha Crimea bad na ka bynta ban kyrshan ïa ki shipai kiba don ha khmat eh. Ka jingshna ïa katei ka jingkieng, kaba dei ka dak kaba khlain bha jong ka jingshim beain jong ka Russia ïa katei ka dewlynnong ha u snem 2014, kaba la pynsngewsih ïa ki nong Ukraine.
Katba ki shipai jong ka Russia, ki dang ïakhun ban siat ïa ki namding bad ki drone jong ka Ukraine hapoh ka nongbah Kyiv, kiba la pynjulor ïa ki ar tylli ki jingkieng bah jong ka nongbah jong ka Ukraine bad kaba la wanrah ruh ïa ka jingiap jong 2 arngut ki briew ha katei ka jingjia.
Ka jingjur jong ki jinghiar thma na suiñ dang shen ka la jia ha ka por ba ka Russia bad ka Ukraine ki dang ap ïa ka tarik na ka bynta ka jingïakren kaba bud da ka US kaba thmu ban pynkut noh ïa ka thma kaba la sdang da ka jinghiar thma ba pura jong ka Moscow ïa ka ri marjan jong ka ha ka 24 tarik u Rymphang, 2022.
U President ka America, u Donald Trump, u la pynpaw ïa ka jing-angnud jong u ban ioh ban iakren halor ka thma ha Ukraine, ha ka jingiakynduh jong u, kaba dang khmih lynti bad u President ka China, U Xi Jinping bad U President ka Russia, U Vladimir Putin, ha China ha kane ka taiew.