Jerusalem, Naiwieng:
Ka tnat shipai ïada jong ka Israel, ka iathuh ba ka la sdang ïa ka jingkhynra, ha ka Sngi Balang ha ki thaiñ ba la synshar hi da ka Hamas, hapdeng jong ka nongbah Gaza, ha kaba uwei u nongthoh khubor jong ka AFP, u la iohi ïa ki tup- ki man jong ka Israel, kiba ki la leit poi sha ka phang Mihngi jong ka ktem phetwir ha Nuseirat.
Katei ka jingwan hiar thma ki shipai Israel ha madan, ka la jia hadien ki ilekshon Israel, ki bym shym la lah satia, ha kaba u Gadi Eisenkot, na ka liang pyrshah, u la pyrshang ban thaw ïa ka sorkar thymmai ban pynkhyllem noh ïa u Myntri Rangbahduh ka Israel – u Benjamin Netanyahu, uba la smai ba un pyntikna ïa ka jingshngaiñ jong ka Israel.
Ka tyllong khubor pahara jong ka Gaza ka la iathuh ha ka AFP ba ka la don ka jingsiat suloi kaba jur jong ka Israel” shaphang shathie jong ka jaka sah jong ki nongphetwir jong ka Nuseirat bad ka la iathuh ba ki kali shipai Israel ki don ha pdeng jong ka Gaza “hapdeng ka jingsiat suloi bad jingsiat liengsuiñ kaba dang ïaid shakhmat naduh ka por shiteng sngi”.
Ki shipai bad ka tnat pahara hapoh ka ri ka Shin Bet ki la sdang ïa ka jingïatreilang ban “pynpra ïa kawei ka thliew lehnoh kaba don shaphang sepngi jong u Yellow Line kaba buh jingma mardor bad beit ïa ki shipai IDF”, la ong ka tnat shipai ha ka kyrwoh.
U Yellow Line, uba la pynbna da ka Israel, hadien ka jingsdang jong ka jingsangeh thma kaba mynta ha u bnai Lber 2025, u pyniakhlad ïa ki jaka ba la synshar da ka Israel bad ka Hamas, ha kaba ki shipai jong ka Israel, ki ong ba ki synshar ïa palat 60 percent jong ka jaka jong ka Palestine.
U nongaiktien jong ki shipai u la iathuh ha ka AFP ha ka janmiet jong ka sngi thohdieng ba katei ka jingkhynra ka dang iaid shakhmat.