Shah kem u nong Russia ba suba nongsyntiat ha United States

California, Naiwieng: Ki bor pyniaid ka nongbah California ha ka Sngi Balang, ki la pynbna ba ki la ioh kem ïa uwei u nong Russia ba la suba nongsyntiat hapoh Silicon Valley, kaba long ka...

California, Naiwieng:

Ki bor pyniaid ka nongbah California ha ka Sngi Balang, ki la pynbna ba ki la ioh kem ïa uwei u nong Russia ba la suba nongsyntiat hapoh Silicon Valley, kaba long ka kynhun ba ju phah ïa ki jingïarap na bynta ka Ukraine.

U Igor D’iu, u la shah kynnoh ba u la thmu ban trei kum u dkhot nongsyntiat jong ka sorkar bar ri, khlem da pyntip sha u nongiasaid aiñ jong ka US, u la bud-dien ïa ki kam bym dei ban tip paidbah bad u la leh thok ha kiba bun rukom.

“La kynnoh ba ïa u Igor D’iu la thung kam, la bthah bad la ai pisa da ka sorkar Russia ban bud dien ïa ki nongtrei jong kawei ka kompeni teknoloji ba heh jong ka US,” ong u Roman Rozhavsky, uba dei u nongïarap director jong ka tnat wad bniah bad wad bniah jong ka FBI, ha ka kyrwoh.

U Rozhavsky u la ong ba u D’iu u la pyndonkam da ka “jingpeitngor met, ki tiar buddien, bad ki jingithuh thok ban lum jingtip.”

U nongïasaid aiñ jong ka US, u Craig Missakian, ula ong ba katei ka kompeni kyrpang jong ka US, ka dei kaba la shah thombor, namar ka “jingïarap ïa ka Ukraine, ha ka thma jong ka bad ka Russia.”

“Ngin ym shah ïa kino kino ki jingpyrshang, da ki sorkar bar ri lane da kiwei pat ki rukom, ban pynkylla ïa ka Silicon Valley kum ka ktem jong ki kam syntiat jong ki bar ri”, la ong u Missakian.

Ia ka kompeni ba la thmu da u D’iu ym shym la jer kyrteng ha ka jingmudui jong u hynrei la batai ïa ka kum ka “kompany kaba heh, kaba la die paidbah ha ka liang ka teknoloji bad ka jingiada kaba don ki jaka treikam ha kylleng ka ri America, kynthup ha Palo Alto.”

Kat kum ka jingmudui, u D’iu u la leit sha Mexico na Turkey ha u Jylliew 2026 bad hadien kata la pynrung tuh ïa u sha shiliang pud sha ka ri America, ha kaba un ïakren bad ki paralok jong u kiba don ha Russia da kaba pyndonkam ïa ka Telegram.

Ki la bthah ïa u D’iu ban lum jingtip shaphang ki nongtrei jong ka kompeni bad ban leit sha kawei ka dukan kophi kaba don hajan ka ophis jong ka kompeni ha Palo Alto ban “shim dur ïa ki screen laptop jong ki katba ki dang trei,” la ong ka khubor.

U D’iu, u don ha ka pisa kaba $18,000, ka passport thok jong ka US, ha ka kyrteng “Hugo Landry Johns” bad ar tylli ki passport jong ka Russia, ha ka por ba ki agent jong ka FBI, ki la leit ban khynra ïa ka ïing jongu, kaba don ha East Palo Alto, ha u bnai Risaw, ong ka tnat Justice Department.

U lah ban shah set phatok haduh 10 snem lada shah rai pynrem ba u la leh kum u agent jong ka sorkar bar ri khlem da pyntip sha u nongiasaid ain, san snem namar ka jingthmu ban leh kum u agent jong ka sorkar bar ri, san snem namar ka jingbuddien bad shisnem namar ka jingleh thok.

U D’iu u la buh ban leit hajir ha ka ïingbishar jong ka sorkar pdeng ha ka 24 tarik jong une u Naiwieng.