Pyndep ki nongkiew lum ka Jylla ïa ka jingshah hikai kiew lum ha Darjeeling

Shillong, Naiwieng 20 Ki ar ngut ki nongkiew lum ka Jylla hapoh ka lama jong ka Meghalaya Sport Climbing and Mountaineering Association (MeSCMA), u B. Kyrmenskhem Lyngdoh bad u Keliostar Pdai ki la lah ban...

Shillong, Naiwieng 20

Ki ar ngut ki nongkiew lum ka Jylla hapoh ka lama jong ka Meghalaya Sport Climbing and Mountaineering Association (MeSCMA), u B. Kyrmenskhem Lyngdoh bad u Keliostar Pdai ki la lah ban pyndep ïa ka Advanced Mountaineering Course (Serial No. 208) ba la pynlong da ka Himalayan Mountaineering Institute (HMI), Darjeeling naduh 21 tarik u Risaw haduh 17 tarik mynta u bnai.

U Kyrmenskhem u dei na ka 2nd Meghalaya Battalion NCC kaba na Sankardev College bad u Keliostar  u dei u pulit Constable jong ka 3rd MLP Battalion.

Baroh arngut kiba ki nongshah hikai ki la ïoh ïa ka jingkyrshan pisa na ka MeSCMA bad ki la noh synñiang hi dalade ban pyndap ïa ki jinglut kiba dangsah, kaba pyni ïa ka jingaiti bad jingkut jingmut jong ki ban bteng ïa ka jingshah hikai ba kham shalor ha ka kam kiew lum.

Kum shi bynta jong katei ka prokram shah hikai, baroh ar ngut kitei ki nongkiewlum ka Jylla ki la lah ban pyndep ïa ki jingshah hikai jong ki bad ban poi sha kliar u lum B. C. Roy uba don 18,000 phut. Kane ka pyni ïa ka jinglah ban shah ha ka bor met jong ki, ka jingtbit, bad ka jingkut jingmut jong ki. Ha katei ka jingïalang, ki nongshah hikai ki la pyni da ka jingsngew sarong na ka bynta ka ri na ka bynta ban rah ïa ka lama jmong ka ri, ka lama jong ka HMI, ka lama jong ka MeSCMA bad ka lama jong ka 3rd MLP Battalion, kaba pyni ïa ka jingsarong jong ka ri.

Da kane ka jinglah ban kynjoh sha ka thong jong ka jingjop, u Kyrmenskhem, ryngkat bad ki 12 ngut kiwei pat ki nongshah hikai, ki la ïoh ïa ka khusnam “Best Expedition Planning”, kaba ithuh ïa ka jingtbit jong ki bad ka jinglong ba la khreh ka jong ki.

Ha ka 17 tarik mynta u bnai, ka HMI, Darjeeling ka la pynlong ka jingleh burom halor ka jinglah ban pyndep ki 59 ngut ki nongshim bynta ha katei ka prokram ai jinghikai.

Na ka liang u Principal ka HMI, u Col. Rajneesh Joshi, uba la ai khublei ïa ki samla kiba la pyndep ïa ka jingshah hikai bad ai mynsiem ïa ki ba kin pynneh ïa ki jinglong ba kordor jong ka jingshlur, ka akor ka burom, ka jinglong nongïalam bad ka jingminot ha ka lawei ka ban wan.

Ha kawei pat ka liang ka MeSCMA ka la ai khublei ïa kitei ki ar ngut ki nongshah hikai kiba la lah ban pyndep bad ka la ai jingkitbok kitrwiang ïa ki ha ki kam kiew lum jong ki ha ka lawei. Kane ka jinglah jong ki ka long kawei pat ka sienjam kaba ai mynsiem ban pynkhlaiñ ïa ka jingïalehkai kiew lum ha ka Jylla.