Pynliem ka India ïa ka Malaysia ha ka jingïalehkai hockey jong ka Women’s Asian Champions Trophy

Shillong, Naiwieng 20 Ki nongjop ba rim (defending champions), ka India, ki la sdang ïa ka jingïalehkai ban ïada ïa ka nam lahduh ha ka Women’s Asian Champions Trophy da ka jingjop ba donburom 4-1...

Shillong, Naiwieng 20

Ki nongjop ba rim (defending champions), ka India, ki la sdang ïa ka jingïalehkai ban ïada ïa ka nam lahduh ha ka Women’s Asian Champions Trophy da ka jingjop ba donburom 4-1 pyrshah ïa ka Malaysia ha ka sngi Palei ha International Sports Complex ba don ha Nathu Barkheda, Bhopal.

Ka Malaysia ka la pynlyngngoh ïa ki trai jaka ha ka bynta ba ar (second quarter) jong ka jingïalehkai haba ka Nuramirah Zulkifli ka la thep ïa ka kol ha ka minit ba 19. Hynrei, ka India ka la pynphai biang kloi. Ka nongïalehkai shakhmat, ka Mumtaz Khan, ka la thep ïa ka kol tang hadien kumba 20, kaba la pynlong ïa baroh ar kynhun ban leit shongthait ha ka shiteng por (half-time) da kaba ïakhaid 1-1.

Ka India ka la synshar bha ha ka kylla miet, da kaba pyndonkam hok ïa ki penalty corner ban tam shakhmat. Ka kapten Salima Tete ka la ai jingtam ïa ka India sa kawei ka kol ha ka minit ba 35.

Tang saw minit hadien kata, ka nongïalehkai ba dang mih pyrthei nyngkong (debutant), ka Puja Sahoo, ka la pyntam shuh shuh ïa ka India da kaba thep biang na kawei pat ka penalty corner ha ka minit ba 39. Ka nongïalehkai ba la tbit bha, ka Lalremsiami, ka la pynskhem ïa ka jingjop ha ka minit ba 49 da ka kol kaba lai jong ka India na ka penalty corner ha kata ka janmiet. La jied ïa ka Puja Sahoo kum ka Player of the Match na ka bynta ka jingïalehkai ba kynsai jong ka ha ka sien ba nyngkong ba ka mih madan ha ka kyrdan international.

Ka sngi plie ka la khring shibun ki paidbah nongpeitkai, kaba long ruh ka sien ba nyngkong eh ba ka nongbah Bhopal ka la pynlong ïa ka lympung ïalehkai hockey ba heh ha ka kyrdan international.

Ha kiwei pat ki jingïalehkai ha kajuh ka sngi, ka China ka la pynliem ïa ka Thailand da 7-0, katba ka Japan ka la jop da 1-0 ïa ka South Korea lyngba ka kol ba la thep ha ka minit ba 59 da ka Hanami Saito.

Ka India kan sa wan phai biang sha madan ban ïakhun pyrshah ïa ka South Korea ha ka jingïalehkai group-stage kaban bud ha ka 21 tarik u Naiwieng 2026.