Jowai, Naiwieng 20
Ka West Jaiñtia Volleyball Association, Jowai ryngkat ka jingïatreilang bad ka ophis District School Education Officer West Jaiñtia Hills ka la pynkut noh ïa ka 1st Inter School Volleyball Competition 2026.
Ïa kane ka lympung ïalehkai kaba la sdang naduh ka 9 tarik mynta u bnai, ka la poi sha kaba kut ha ka 13 tarik ha madan Biar skur, Biar ka Blai Mission Compound, Jowai.
Ha katei ka sngi, ka District School Education Officer ka Dr. Wa I Sa Sumer ka la long ka kongsan ha ka jingdonlang u Dilip Gurung, General Secretary ka Meghalaya State Volleyball Association, ki dkhot ka West Jaiñtia Volleyball Association, Jowai kynthup naduh u President Bah Lammat-o-Laloo, General Secretary Bah D. Syngkrem nalor kiwei kiwei.
Ha kane ka lympung la shim bynta da 5 tylli ki skul kynthup ka Govt. Boys Higher Secondary School, Jowai, Govt. Girls Higher Secondary School Jowai, Kiang Nangbah Govt. Higher Secondary School, Thomas Jones Synod Higher Secondary School, bad Sawlyngdoh Higher Secondary School, Mowkaïaw.
Haba phai sha ka jingïalehkai, ha ka liang ki shynrang, ka Sawlyngdoh Higher Secondary School, Mowkaïaw ka la long ka lahduh, da kaba pynliem ïa ka Govt. Boys Higher Secondary School da 21-25, 18-25, bad 26-28.
Katba ha ka liang ki kynthei la jop da ka Govt. Boys Higher Secondary School Jowai, da kaba pynliem ïa ka Govt. Girls Higher Secondary School Jowai da 25-4 bad 25-7.