Shillong, Naiwieng 20
Ka Shillong Lajong FC ka la hap ban ïakhun tyngeh na ka jingshah thep ar kol ban pynliem noh hadien ïa ka Mawkhar SC da 3-2 kol ha ka Group B jong ka lympung SSA Champions Cup 2026 da ka jingïalehkai kaba la long ha ka 20 Naiwieng 2026 ha madan SSA Stadium.
U Mackiven Shyrkon (16′) bad u Donbok Sohtun (25′) ki la thep ar kol na bynta ka Mawkhar ha ka shiteng kynta shuwa ba ka Lajong kan wanphai lyngba ka kol ki lai ngut ki Marbaniang, kata u Wilbert Marbaniang (34′), u Emanbha Marbaniang (45′) bad u Badondor Marbaniang (68′) kaba la pynkylla syndon ïa ka jingïalehkai.
Ka Lajong (mynta ryngkat 9 poiñ na 3 tylli ki jingïalehkai) kaba la lah ban buh jaka ïalade ha khlieh duh ha ka group bad ban rung sha ka semifinal, katba ka Mawkhar (6 poiñ na 4 tylli ki jingïalehkai) ka dang wan ba ar. Ka Sanmer SC, Sohryngkham SC bad Sei La Sap FCC – ki don mar 3 poiñ.
U Mackiven u rang thep kol ka kjat ka diang u la lah ban thep kol nyngkong ha kane ka jingïalehkai katba u Donbok u la thep ïa ka kol ba ar. U ‘rangapkol ka Mawkhar u Skhembor Mashra u la lehkai bha hynne ka sngi ha ka ba u la lah ban khang ïa ka jingpyrshang thep kol u Wilbert hadien ka free kick lyngba u Ïohborlang L Lyngkhoi.
Katba na ka liang ka Lajong, u Wilbert u la ïoh ban thep kol da ka khlieh katba ki ranglehkai ka Mawkhar ki dang mut ba la dei ka offside. U Emanbha u la thep kol ha shuwa ka half time. Katba u Badondor u la long donbok ha kaba u la ïoh ban thep da ka kol ka ym don ba poi pyrkhat bad pynïoh syndon da ka jingjop ïa ka Lajong.
Kin don ar tylli ki jingïalehkai ha ka 21 tarik Naiwieng 2026 ka ban sdang naduh ka por 2:30 janmiet. Ha ka Group A ka kynhun ha ka kyrdan ba 3 bad ba 4 ka Mawpdang SC bad Lamlynti FC kin ïakhun ha ka jingïalehkai ha madan SSA Stadium, Katba ha madan MFA Ground na ka Group B ka Sanmer kan ïakhun pyrshah ïa ka Sei La Sap.