Shillong, Naiwieng 19
U nongñiah thuk thuk ka Jylla u Banteilang Jyrwa u la lah ban pynpaw ïa ka jingtbit da kaba khur jingjop ha ka Rally de Hampi 2026 (Utsav de Hampi), kaba la long ha ka 14 bad 15 tarik mynta u bnai ha Hampi, Karnataka.
Kane ka wat kaba ar ka long shi bynta jong ka MRF MoGrip FMSCI National Rally Championship (Two-Wheeler).
Haba ïashim bynta ha ka Class 4 Super Sport Above 165cc haduh 260cc Group-B, u Banteilang ula wan ha ka kyrdan ba nyngkong bad u la wan balai ha ka Rally.
U Banteilang uba la mihkhmat ïa ka kynhun Petronas TVS Racing, u la lah ban pynurlong ïa ki jingjop jong u.
Ka Rally de Hampi, ka dei ka jingwanphai biang jong kane ka jingïakop ñiah thuk thuk sha Hampi hadien ka jingsangeh kaba saw snem, ka la pynïasoh lang ïa ki katto katne ki nongñiah kali ar shaka kiba tbit tam ha ka ri, hynrei u Banteilang u la lah ban khur ïa ka jingjop.
Na ka liang ka Meghalaya Motorsports Society ka la pynpaw ka jingsarong halor kane ka jingjop, kaba wanrah ïa ka jingithuh ym tang ïa u Banteilang kum u nongñiah thuk thuk uba tbit, hynrei wat ïa ka Meghalaya bad ïa ka kynhun ki nongñiah kali kiba la nangkiew shaphrang. Ka jingjop jong u ka pynpaw ïa ka jinglah jong ki nongïalehkai na ka Jylla ba kin pyni ïa ka sap ba kyrteng ha kylleng jong ka ri.
Ka MMS ka ai khublei ïa u Banteilang bad ïa ka kynhun jong ka Petronas TVS Racing halor kane ka jingjop bad ai ka jingkitbok ïa u ba un nangïai bteng ban khur ïa ki jingjop ha ka lawei ka ban wan.