Aizawl, Jylliew:
U Symbud Myntri Rangbah jong ka jylla Mizoram, u Tawnluia ha ki khyndiat sngi kiba la leit noh u la pyntip ba ka sorkar jylla da ka jinglah ban pyntrei kam janai ïa ka skhim Jal Jeevan Mizzion (JJM) jong ka Sorkar Pdeng ka la lah ban pynbiang ïa ki kor umdih sha ki 86% ki longïing longsem kiba na ki thaiñ nongkyndong jong ka jylla.
Na ka liang u Myntri u la pyntip ba haduh 316 na ki 728 tylli ki shnong rit la lah ban pynbiang ïa ki kor umdih lyngba ka jingpyntreikam ïa ka skhim JJM.
U la ïathuh shuh shuh ba ki don haduh 1.33 lak tylli ki longïing na ki thaiñ nongkyndong ha ka jylla Mizoram, bad ka sorkar ka la lah ban pynbiang ïa ki kor umdih sha palat 1.14 lak tylli ki longïing nongkyndong lyngba ka prokram Functional Household Tap Connection (FHTC).
Na ki 728 tylli ki shnong nongkyndong, ki la don 316 tylli ki shnong kiba la pyntreikam hapoh ka skhim JJM.
Ha ka jingïalang bad ki lad pathai khubor, na ka liang u Myntri u la pyntip shuh shuh ba ïa ki kor umdih la lah ruh ban pynbiang sha ki 2,013 tylli ki skul bad sha ki 1,526 tylli ki Anganwadi centre kiba don ha ki thaiñ nongkyndong jong ka jylla.
Na ka liang u Myntri u la pyntip shuh shuh ba ka Sorkar Jylla ka don ïa ka thong ban pynbiang ïa ki kor umdih sa sha ki 22,485 tylli ki longïing nongkyndong ha une u snem u ba mynta (4,318 tylli ki longïing kiba la dep ban ïoh lypa ïa ki kor umdih).
Ha ka jingïalang, na ka liang u Myntri ula pyntip shuh shuh ba ka thaiñ Mamit – ka thaiñ kaba don markhap bad ka ri Bangladesh bad jylla Tripura dang shen ka la ïoh ruh ban rah ïa ka “National Award” ha ka kyrdan kaba nyngkong kum kawei na ki distrik kaba la lah ban pyntreikam pura ïa ka skhim JJM.
Nalor ka thaiñ Mamit, u Myntri u la pyntip shuh shuh ba ka thaiñ Kolasib district ka la ïoh ban khur ïa ka khusnam ha ka kyrdan kaba lai bad ka thaiñ siaha District pat ka la ïoh ban khur ïa ka khusnam ha ka kyrdan kaba san.
