Paris, Jylliew:
Katkum ka khubor ba lah iohlum na ka lympung ialehkai tennis jong ka French Open ka long ba na ka bynta ka jingiakhun semifinal ki shynrang, u Casper Ruud (Norway) un pynkhreh bha ialade na ka bynta ka jingiakhun pyrshah bad u Alexander Zverev ka Germany ha katei ka rynsan iakhun jong ka lympung, hadien ba utei u rangialehkai na Norway u la lah ha ka ban pynleitphai iing noh ia u nongiakhun pyrshah na Denmark u Holger Rune da 6-1, 6-2, 3-6, 6-3.
Kumta ruh u Ruud uba lah mad ia ka jingshah pynrem ha ka jingiakhun phainal ha u snem lah dep ha ka tei ka lympung ialehkai ha u Rafael Nadal, u la lah mynta ha ka ban pynliem noh ia u Rune ha ka sien kaba saw ha ki hynriew jingialehkai bad ioh ruh ban pynhiar-kput ia ka jingshah pynrem ka jong u ha ka jingiakhun semifinal jong ka lympung ialehkai ha Rome dang ha u bnai ba lah dep. Haba phai khyndiat sha ka jingialehkai, u Ruud u lah mad ia ki arsien jingshah pynkhein dor-thong ha kab sdang jong ka jingialehkai, bad hadien kata u lah pynkloi ruh na ka bynta ban buh ia ka jingeh hakhmat jong ka jingsam bol u Rune da kaba ioh pynkhein arsien ha ka jingialehkai kaba la lah shiliang ha ka set iakhun kaba nyngkong. Ha ka jingiakhun kaba ar, u lah ioh ban pyniaid ia ka jingialehkai ha shuwa ba u Rune un ialeh ban wanphai biang sha ka jingiakhun ha kaba u lah pynjubor ia ka jingiakhun sha ka set iakhun kaba saw. Hynrei u Ruud u la lah ban sar 4-1 dor-thong jingjop shakhmat bad buh ruh ia u Rune Shabar bad kham pajih ha ka dor-thong ialehkai kaba san ka jong u.
