Dibrugarh, Jylliew:
Ki bor sorkar jong ka jylla Assam ha ka 8 tarik mynta u bnai ki la pyntip ba 2 ngut ki nongtrei tih dewïong ki la duh ei ïa la ki jong ki jingim ha kawei ka thliew tih dewïong kaba don ha ka shnong Ledo, Tinsukia District.
Kat kum ka jingïathuh jong ki bor pulit, ki la pyntip ba ïa ki metïap jong kitei ki 2 ngut la ïoh ban sei ha ka sngi Balang ba la dep na kawei ka thliew tih dewïong (rate hole mine) kaba don ha ka shnong Molo Pahar – ka shnong kaba dang hap hapoh ka jingkhmih jong ki bor pulit ka Ledo PS, Tinsukia district.
Halor katei ka jingjia, na ka liang ki bor pulit jong ka thaiñ ki la suba jur ba kitei ki 2 ngut ki la duh ei ïa la ki jong ki jingim hadien ba ki la ïoh ring ïa ka lyer bih ‘methane’ kaba la mih ha katei ka krem dewïong kaba la shu pyntrei beaiñ. Kat kum ki jingïoh lum jingtip ba uwei napdeng ki nongtih dewïong u ba la khlad noh na katei ka jingjia u dei u ba la tip kyrteng kum u Nayan Phukan – nongshong shnong ka thaiñ Itakhuli, Ledo. La ïoh jingtip ba u Nayan u trei ïa ki kam tih dewïong ha ka par beaiñ kaba dei trai da uwei u briew u ba la tip kyrteng kum u Kitesh Debnath.
Kat kum ki jingïoh lum jingtip na ki bor pulit ki la pyntip ba bun ngut na ki samla kiba leit ban trei ha kum kitei ki par dewïong ba beaiñ ki la duh ei ïa la ki jong ki jingim bad bun na kitei ki samla ki dei kiba wan na ki longïing longsem kiba duk ba kyrduh.
Dang ha u Nailur jong u snem ba la dep, ki la don haduh 3 ngut ki nongtih dewïong kiba la duh ei ïa la ki jong ki jingim ha kawei ka par dewïong kaba beaiñ kaba don ha katei kajuh hi ka shnong (Ledo).
Na ka liang ki bor pulit ka thaiñ, ki la pyntip ba ki par dewïong ba beaiñ ki kynrei tam ha ka thaiñ Margherita bad Ledo – Tinsukia district. Ki la pyntip ruh ba watla na ka liang ka sorkar jylla ka la khang pyrshah ïa ki kam tih dewïong ‘rat hole mining’, pynban kitei ki par dewïong ki dang trei kam tad haduh kine ki sngi kiba mynta.
