C. B. Iawphniaw
Katkum katei ka 2nd Amendment bill jong ka KHADC ka la batai shai ba ki kynthei Khasi kiba ioh lok dkhar bad ki khun ki kti kiba mih na katei ka jing-iashongkha khleh kin duh noh ia ki hok bad ia ki jingmyntoi baroh kum ki schedule tribe.
Hynrei katei ka bill kam pat trei kam ha kito kiba ioh lok dkhar. Bun kiba dang ioh myntoi kum ki Schedule tribe da kaba ai jait ai khong sha ka kmie ia kito ki khun na ki kpa bym dei Khasi. Kam don ka jingkylla ki dang ai jait ai khong kumjuh bad ioh ia ka hok kumjuh kum ki khun Khasi paka. Te kan myntoi aiu haba wanrah ia ka bill tang ha kot sada. Ki paidbah ki kyrmen ba katei ka bill ka lah ban iarap bad ai jingmyntoi ban pynkylla ia ka jingshim jait khyllah ha ka rukom ai jait ai khong ha ka dustur ka riti Khasi nylla.Phewse katei ka bill ka wanrah pynban ka jing-iakren khluit bad ia kynnoh bad ia kawang ktieh ha ka jaitbynriew.
Ha ka jingshisha katei ka bill ka la wanrah ka jingkylla pynbha ia ka dustur ka riti u khun Khasi khara. Kane ka bill ka la pynkmen tohhoh ia ki Khasi paka, namar ka long ban pynneh pynsah ia ka jinglong kyrpang jongngi ki Khasi ym ban pynlong Khasi ia ki khun na ki kpa bym dei Khasi.
