Guwahati, Jylliew:
Ki bor pulit jong ka jylla Assam ha kane ka taiew kaba mynta ki la pyntip ba ar ngut ki suba nongbeh mrad beaiñ ki la ïoh ïa ki jingmynsaw kiba jur hadien ka jingjia ïather kuli kaba la jia ha ka thaiñ Musalpur Division jong ka Manas National Park, Assam. Katei ka jingjia ka la jia ha ka sngi Balang kaba la dep.
Kitei ar ngut kiba la ïoh ïa ki jingmynsaw ki kynthup ïa u Dharmendra Vari bad u Gopal Bahadur Magar – ki nongshong shnong ka thaiñ Baksa district.
Kat kum ki jingïohlum khubor la ïathuh ba katei ka jingjia ka la jia hadien ba ki bor sorkar ka tnat khlaw ki la leit ban pynlong ïa ki jingkhynra kiba jur ha katei ka thaiñ. Ha ka jingleit khynra jong ki, ki la lap ïa kitei ki suba nongbeh mrad beaiñ hapoh u pud u sam jong ka khlaw kaba la mana pyrshah ban rung shapoh.
La ïoh jingtip ruh ba na ka liang ki bor pahara ka tnat khlaw ha kaba nyngkong ki la bthah ïa kitei ki runar ban wan pyndemwait, hynrei na ka liang ka jong ki ki la kyntait ïa ka jingbthah bad katei ka la wanrah ruh ïa ka jingïather kuli kaba shyrkhei hapdeng jong ki.
Ïa kitei ar ngut ki runar kiba la ïoh ïa ki jingmynsaw la leit ban pynkit noh sha Barpeta Medical College na ka bynta ki lad jingsumar kiba janai. Na katei ka kynhun runar, ki bor pahara ka tnat khlaw ki la ïoh ruh ban kurup ïa 5 tylli ki suloi shna hi, bun tylli ki kuli siat mrad, ka doh sniang khlaw bad kiwei kiwei.
