Hyderabad, Jylliew:
Ka seng Indian Youth Congress (IYC) ka la rai ban pynlong da ka ‘bus yatra’ ha kylleng ki jaka jong ka jylla, ha kaba yn sa sdang na ka Gajwel Assembly konstitwensi, ba la mihkhmat da u Myntri Rangbah u K Chandrasekhar Rao.
Ka rai halor kane ka la long ha ka por ba la don ka jingïalang ba lai sngi ba la pynlong ïa ka Executive Meeting kaba la long ha ka nongbah ha ka sngi Balang.
Ha ka por ba la don ka jingïalang, ki nongïalam jong ka IYC na kiba bun ki kynhun ha ka jylla ki la rai ban pynjop ha kaba ïadei bad ki Campaign ba la pynlong ha Karnataka bad ki jingthmu pyntreikam ha ki saw tylli ki jylla ki ban long na ka bynta ka jingpynlong ilekshon ha une u snem.
Ki nongïalam jong ka Youth Congress ki la pdiang ïa ka rai jong ka seng ha ka ban ai da 50 per cent ki konstitwensi sha ki samla.
Ki heh nongïalam jong ka seng Congress, kynthup u MP u N Uttam Kumar Reddy, u Secretary jong ka AICC u Ch Vamshi Chand Reddy, u President jong ka IYC u Srinivas BV, u AICC In-charge na ka bynta ka IYC u Krishna Allavaru, u President jong ka Telangana Youth Congress u Shiva Sena Reddy bad u Working President jong ka seng TPCC u Mahesh Kumar Goud ki la ïashim bynta ha ka jingïalang.
Ha ka jingai jingkren ha ka jingïalang u Uttam Kumar Reddy u la kynthoh jur halor ka seng BRS kaba la ïalam ïa ka jylla bad ka sorkar kmie ka seng BJP ha kaba u la kynnoh ïa ki ba ki la shet kylla ïa ki samla kiba khlem kam khlem jam ha ka jylla.
Ka jingiehnoh beiñ jong ka sorkar KCR ka la ktah jur ha ka liang ka ïohkam-ïohjam jong ki samla, u la ong.
