Bertina Lyngdoh
U briew, u mrad, u dei u jait jingthaw uba im ïa kaba U Blei U la saiñdur. Ki tiar ki tar ki dei kita ki bym don jingim ha kaba u briew u im bad pyndonkam ïa ka. U briew u im ha ki jingthung jingtep kum ha ki jhur ki jhep kumjuh ruh de ha ki mrad kum ban pynbang ja ïa ki. U ksew, u sniang, u syiar, u masi, ki dohkha, nalor kaba ngi bam ïa ki, ki long ruh ka jingkyntiew ïa ka ïoh ka kot u briew. U mrad u don ïa ka juh ka mynsiem ne ka jingsngew wat la u im hapoh u bynriew. U tip kino kiba bha bad ba sniew kino kiba ieit bad ba sang. U tip ruh kino kiba biang ne duna bad dei namar kane, um ju thew ïa ka jingbakla, shrai, bad dom kulmar. Namar kane, ka don ka jingong kaba ong ba “Dang lah kaba ieit ïa u mrad ban ïa u briew.”
Ha ka jingïaid lynti ka pyrthei, ngi donkam beit para briew bad ka bym lah lait satia. Katta nang bun ki mynsiem ba bha, katta ruh nang bun uba jynjar bad kordit. Haba ka mynsiem hi ka tam, un im bad bam kordit namar kito kiba kham kordit bad ba u lenlade ban biang ma ki. U sngewthuh ïa ka jingjynjar kiwei bad kloi ban ieh la ki kam namar jong ki. Kine, kim ju jied ïano yn phaikhmat bad ïano yn phai lyndet. Barabor ki dei kita kiba pdiang ïa U Blei ha ka dohnud. Ka jingsngewbha ka pyrthei hi ka long kawei na ki daw ïa kaba uba bun u ngop, bad pyndonkam bakla noh ïa ka mynsiem bha kum u diengshaiñdoh.
Uba kham kor ha ka mynsiem, u wan rah ïa ka jingphuh samrkhie ha ki khmat kiba kordit, wat lada u la shah pynmong la bun bun sien. Nalor kane, u pynkhlaiñ ïa u na ki jingtlot, u pynrkhie ïa uba ïam, bad pynkoit ïa kiba pang. Ba mynsiem te ka bha palat, ngi lehkai noh pat kum uta u diengshaiñdoh. ïa ka doh, ngi ot, shet, shaiñ bad bam, hynrei ym ka mynsiem briew. ïa kane ka jingleh ym baroh uba lah ban shah kum uta u diengshaiñdoh. ïa ka mynsiem ba la bsa pynbit bad pynbiang, Ym bit ban lehkai, lehbeiñ, ne ka thok ka shukor. Baroh kine ki jia namar ka jingpynshoi bad ba ka shong hangi kumno ban kiar na kita.
Namarkata, to ngin ym pynlong u diengshaiñdoh ïa uba lah bad kit ïa ngi. Ka mynsiem briew kam dei ka tiar kaba khlem jingim. Kheiñ kawei-pa-kawei ka jingkyrkhu kaba phi ïoh na ki, bad da pynshong dor ïa ki. Lada ki la shah pyndonkam bakla, kim long shuh kajuh ka mynsiem ïa kiwei pat. To duwai to phirat ïa ka koit ka khiah, ka kamai ka kajih ban ïoh lem kiwei ïa ka juh ka jingmyntoi bad jingkyrkhu.
