Egypt, Jylliew:
Katkum ki khubor la iathuh ba 3 ngut ki nong Britain ki la jah rngai na kawei ka jhad ri kaba kit ia ki nongleit shang kai pyrthei hadien ba katei ka jhad ka la kem ding ha ki bynta ka Red Sea jong ka Egypt ha ka Sngi U Blei. Katei ka jhad ka dei kaba thmu ban leit sha Elphinstone Reef bad la ong ba katei ka bynta jong ka duriaw ka long kaba suk bha ia ki shark bad ki dolphin ba kin iohi lada don kano-kano ka lieng ne ka jhad ba kem ding. Ha katei ka lieng ki don 29 ngut kiba shong kynthup ia 15 ngut ki nong Britain ha ryngkat 14 ngut ki nongpynïaid bad nong-ap pahara jong katei ka jhad.
Nalor jong kitei ki 3 ngut kiba dang jah rngai, 12 ngut la ioh ban pyllait im noh na ka lieng ba la ju khot ka ‘Hurricane’, narud ka duriaw Marsa Alam bad la ong ba kitei kiba lait-im baroh kim shym don jingmynsaw ne shah ktah eiei na katei ka jingjia ha katei ka sngi.
Ha ka video ba la saphriang paidbah, la iohi ia katei ka jhad kaba la kem ding jur ha ryngkat ka tdem kaba rben kaba mih na katei ka jhad ha ka por ba kem ding.
La ong ba katei ka jhad ka la mih na Ghalib ha ka Sngi Ba-ar (6 tarik u Jylliew) bad ka la dei ban leit phai biang noh ha katei ka Sngi U Blei. Ki bor pyniaid ki iathuh ba ka jingkem ding jong katei ka jhad ha katei ka jingjia ka lah ban long namar ka jingthud ka bor ding ilektrik ha katei ka jhad.
Namar katkum ka jingpeit thuh jong ka tnat khmih duriaw, la shem ba ka bynta ba pynshong ia ka ‘engine’ jong katei ka jhad ka la thud bad ba ka sdang ruh ban kem ding na katei ka bynta.
Kumta, ki bor pyniaid duriaw ki dang ialeh shitom ban wad ia kitei ki 3 ngut kiba dang jah napdeng jong katei ka kynhun kaba shong ha katei ka jhad ha katei ka sngi.
