Washington, Naitung:
Ka FBI ha ka Sngi Balang, ka la pyntip ba ka la ioh kem noh ia u Harmanveer Singh, uba ka la pynbna thwet ha kine ki khyndiat sngi ba la dep. Ia u Singh la ioh kem da ki heh pulit ka US kiba ap pahara ha ka surok bah ha California.
Kumta la ong ba ia u Singh la ioh kem na Stocktonjong ka nongbah California ha ka Sngi Ba-ar da kitei ki heh kiba iaid pahara ha ka surok California.
Kane ka jingioh kem jong ka FBI ka long hadien ba ka Operation Hard Ball, kaba long ka tnat kaba bud-dien ia ki kam thombor jong ki runar kiba hapoh ka jingialam lynti jong u Lawrence Bishnoi, Jaggu Bhagwanpuria bad u Ravinder Dhanda.
Katkum ki kaiphod ba la iohlum da ka tnat FBI, la ong ba u Singh u don kti ha ka jingbei tyngka be-aiñ ha ki kam khaii droks bad wat ban phah shalan droks be-aiñ sha kylleng ki bynta jong ka US bad sha ki ri ba marjan ruh kumjuh.
Ka la ong ba ka Ravinder Dhanda Organized Crime Group, ka dei kaba don shabar jong ka Vancouver, Canada, bad la kynnoh ba ka ju shalan bun bah ki drok cocaine bad methamphetamine na ka bynta ki seng khaii drok ha kylleng ka ri America, Canada, bad Mexico.
Ha ka 23 tarik u Jylliew, 2026, la pynmih ïa ka hukum jong ka sorkar pdeng ha ka ïingbishar jong ka ri United States, Central District of California, Los Angeles, California, ban phah kem ïa u Singh hadien ba u la shah pynngat hapoh ki kyndon pynkheiñ aiñ jong ka jingkhaïi khaïi droks bad da ka jingthmu ban pynïar ïa katei ka kam be-aiñ jong u bad ban shalan shabar ri.
Ha ka jingiatreilang jong ki tnat bapher ban leit khynra ha kaba sdang jong une u bnai, ki bor ka aiñ jong ka America, Canada bad Europe, ki la kem ioh kem ïa 24 ngut ki briew, 11 ngut na ki ha California kiba ïadei bad ki lai tylli ki kynhun runar ba la pynbeit ryntih kiba don ha India kiba la shah kynnoh ba ki leh bun ki kam runar.
Haba kyllum lang, ka tnat jong ka ain jong ka US, ka la pynngat ïa 37ngut ki briew ha katei ka jingmudui, kum shi bynta jong ka ‘Operation Hardball’ jong ka.
