Washington, Naitung:
Ka sorkar Trump, ha ka sngi palei, kan pynjari da ki khajna thymmai kiba long 10% bad 12.5%, halor ki mar na ki 60 tylli ki paralok khaïi, kynthup ïa ka European Union, halor ki jingkynnoh ba la pyntreikam lyngkot ïa ki jingkhang pyntrei jubor, thik kumba ka khajna ba shipor kaba 10% ha ka pyrthei, kan kut noh.
Kane ka sienjam ka dei ka jingpyrshang ba khatduh jong ka White House ban pynphai biang ïa ka jingthmu ïalap elekshon jong u President Donald Trump halor ka jingsiew khajna kaba jan ha ka pyrthei hadien ba ka ïingbishar ba ha khlieh duh jong ka US ha u bnai February ka la weng noh ïa ki jingsiew kylliang jong u kiba long 10% haduh 50% kiba la buh ha u snem ba la dep katkum ka aiñ ba kyrkieh jong ka ri ban pyrshang ban pynduna ïa ka jingkhaii jong ka US.
Ki dor ba thymmai, kiba la pynbna ha ka sngi Thohdieng ha ka jingpynbna jong ka Federal Register, kin kynthup ïa 99.4% na ki mar ba la wanrah na US, hynrei ki kynthup ïa shibun ki jingpyllait ïa ki mar, kum ka umphniang bad ka gas, ka sboh bad ki katto katne ki mar bam.
La pynjari katkum ka kyndon 301 jong ka aiñ khaii pateng jong u snem 1974, ki khajna thymmai ki ailad ïa ka bor synshar ban pynneh ïa ka dor ba la buh ha jan baroh ki mar ba wan na US wat hapdeng ka jingshah pynrem jong ka ïingbishar ba ha khlieh duh. Ki dor ruh ki lah ban mad ïa ka jingma kaba kham duna ha ka liang ka aiñ ban ïa kito kiba la pynduh ha u bnai Thohlakhmi, namar ba ka Section 301 ka la lait im na ki jingïakynad ha ka ïingbishar ba la dep.
U Trump, ula jubab ïa ka rai jong ka Supreme Court, ha u bnai February, da kaba buh ïa ka dor ba shipor, kaba 10% na ka bynta 150 sngi, kaba kut noh ha ka por 12:01 a.m. EDT jong ka sngi Palei (0401 GMT). Ki khajna thymmai kin treikam ha kajuh ka por, ha kaba ki mar kiba don ha ka leit ka wan kin pyllait haduh ka por 12:01 baje mynstep EDT ha ka 28 tarik u Naitung.
U Greer u la kular mynshwa ba na ka bynta ki ri kiba la poi sha ka jingïateh kular khaii pateng bad ka Washington kiba la buh kyndon ïa ki dor khajna jong ka US, ki khajna pynbor thymmai kin ym pynbor ïa ki ban kiew palat ïa kita ki kyndon. Ki jingiateh ki kynthup ïa ki kyndon pyrshah ïa ka jingtrei jubor.
Hapoh kane ka rai ba khatduh, ka US kan buh khajna 10% ïa ki mar jong ka Argentina, Bangladesh, Britain, Cambodia, Canada, Ecuador, El Salvador, Guatemala, Honduras, India, Indonesia, Jordan, Malaysia, Mexico, Pakistan, Sri Lanka, Trinidad bad Tobago.
Ia ka European Union, ka Taiwan, ka Japan, ka South Korea bad ka Switzerland la ai ïa ki dor kiba, lada pyniasoh bad ki dor khajna kiba la don lypa jong ki ri kiba kham shah jied, kin long baroh 10% lane 12.5%. Kiwei pat ki 38 tylli ki ri, kynthup ïa ka China, la ai ïa ka dor kaba 12.5%.
