Indore, Jylliew:
Ka khubor ba lah ioh lum ka iathuh ba ia ka trophy jingjop na ka bynta ka lympung ialehkai Kabaddi jong ki kynthei ia kaba lah tip kum ka Women’s Kabaddi League (WKL) ka ban sa long naduh ka 16 tarik mynta u bnai ha Dubai, lah pyllait paidbah mynta ha Indore.
Kumta ruh katei ka lympung ialehkai kan long ka lympung ka ban iai tyllun shakhmat naduh katei ka tarik ba lah buh haduh ka 27 tarik jong une u bnai ba mynta ha kaba haduh 8 tylli ki kynhun ialehkai ki lah ioh ban shimbynta.
Ki kynhun ialehkai kiba lah ioh rung sha katei ka lympung ki kynthup ia ka Rajasthan Raiders, Delhi Dynamites, Gujarat Angels, Great Marathas, Haryana Hustlers, Punjab Panthers, Uma Kolkata bad Bengaluru Hawks.
Ha katei ka juh ka sngi jong ka jingpyllait paidbah ia ka trophy, lah pyllait paidbah ruh ia ka jingrwai-pdeng jong katei ka lympung ialehkai.
Katei ka lympung ialehkai jong ki kynthei ka long shi bynta jong ka jingkyntiew ia ki dor-ka-bor jong ki kynthei ha katei ka jait jingialehkai. Kumta ruh ki riew kynthei na k thain nongkyndong ki lah shah jied na ka bynta ka lympung.
Kumta kita ki riew kynthei kiba lah shah jied ki lah dep ban shimbynta ha katei ka jait jingialehkai ha ki skul, skul-bah bad ruh ha ki rynsan State-level. Ka long ruh ka sien kaba nyngkongeh ha kaba u Tyngshop ba pawbha jong ka kam ak phlim ka Bollywood u Govinda u lah shah jied mynta kum u Brand Ambassador jong ka lympung.
