Shillong, Naitung 15
Palat shiphew million ngut ki briew ki la soi ïa ka jingdawa lyngba ka online ha ka argentinaout.org ban weng noh ïa ka Argentina na ka lympung ïalehkai FIFA World Cup 2026, da kaba kynnoh ba ka FIFA bad ki rephri kiba la noh tarajur sha ka liang u Lionel Messi bad katei ka lahduh jong ki saw snem ba la lah.
Ïa katei ka jingdawa la pyni ha ka argentina-out.com, kaba la ïoh shibun ki jingkynthoh pyrshah hadien ba ka Argentina, ka la wanphai da ka jingjop ïa ka Egypt ha ka pre-quarter final.
Ha katei ka jingkyrpad la kynnoh ba ka Argentina ka la ïoh ïa ki rai ïashah liang ha baroh kawei ka lympung ïalehkai.
“Ka ‘Argentina Out’ ka dei ka jingïakhih ba la ïalam da ki nongkyrshan kiba la dawa ïa ka Argentina ban weng noh na ka World Cup 2026,” la thoh ha ka. “Soi ïa ka dorkhas ‘Kick Out Argentina’ ban pyntreikam katkum ki kyndon, ka jingpynïaid kaba khuid, bad ka jingïakhun kaba khuid ba suba na ka bynta kawei pa kawei ka ri. Pynmih ïa ka sur jong phi bad ïarap ban dawa weng noh ïa ka Argentina, ka bym lah long ban shu shah kyntait.”
Ki kynrum kynram ki la nangjur hadien ba ka Argentina ka la wanphai na ka jingshah tam da 2-0 ha ka Egypt, kaba la ïoh ban thep ïa ka kol kaba lai wat hapdeng ka jingpynlehnohei u Messi ïa ka penalty kaba kham hashwa.
Ka Egypt ka la bitar lep hadien ba kawei na ki kol jong ka, ka la shah kyntait noh hadien ka jingbishar bniah jong ka VAR, katba la pynksan ïa ka Argentina watla ka la dei ban ïoh ‘foul’ na ka daw ka jingleh bakla ïa u Mohamed Salah ha katei ka jingïalehkai.
U manager jong ka Egypt, u Hossam Hassan, um shym la sangeh hadien ka jingïalehkai, da kaba ong, “Ngan ong ïa kaei kaba nga ïohi, khlem da kheiñ ïa ki jingma kiba lah ban mih. Kane ka la paw shai ïa ka jingshah leh shilliang khmat, bad baroh ki la ïohi ïa kane. Lada ki kwah ba kin jop haduh katne, balei ki khot ïa baroh ban ïashim bynta ha ka World Cup?”
Shuwa ban sdang ïa ka quarter final jong ka Argentina, u manager jong ka Argentina, u Lionel Scaloni, u la kyntait ïa kitei ki jingkynnoh, da kaba ong ba ka jingdon ki kor jingstad jong ka juk mynta, kam lah ban long ba yn lah ban leh shiliang khmat da ki rephri. “Ha u snem 1986, ki la ong ruh ba ka Argentina ka ïoh ïa ki jingjop bym hok. Kane kam dei kaei kaei kaba thymmai na ka bynta jong ngi,” u la bynrap.
U Scaloni u la bynrap, “Ki don ki briew ki bym sngewtynnad ban ïohi ba ka Argentina kan khur jingjop. Kine ki jingkynthoh ki ai mynsiem tang ïa ka kynhun jong nga ban ïalehkai kham bha.”
Haba batai ïa ka jingmut jong u, u la ong, “Da ka VAR bad baroh ki kor teknoloji kiba ngi don mynta, ka long kaba eh haduh katta katta ban ïarap ïano ïano. Ym don jaka ïa kiba pynkulmar jingmut.”
