Guwahati, Jylliew:
Ki bor sorkar jong ka jylla Assam ha ki khyndiat sngi kiba la leit noh ki la pyntip ba sa kawei ka kieng atiar kaba thymmai kaba la tip kyrteng kum ka Boro Liberation Army (BLA) ka la mih pyrthei ha ka thaiñ Bodoland Territorial Region (BTR) jong ka jylla Assam.
Ha ka jingpyllait kyrwoh jong katei ka seng sha ka Sorkar Pdeng bad kumjuh ruh sha ka sorkar Assam, ka la pyntip ba ka mat trei kam kaba hakhmat eh jong ka ka long ban ïoh ïa la ka jong ka jylla kaba la tip kyrteng kum ka ‘Boroland’. Ka seng ka la pyntip ruh ba la thaw ïa ka ha ka 1 tarik u bnai Rymphang jong u snem 2023.
Ha ka kyrwoh la pyntip shuh shuh ïa ki kyrteng jong ki nongïalam ka seng kiba kynthup ïa u B Dwidengra (President), B Rwngwra (Vice President), B Ankhlai (Army Chief), bad u B Bwkhangsa (General Secretary).
Ka jingmih pyrthei jong katei ka seng kieng atiar ka la jia ryngkhat ruh ha ka por ba u Myntri Rangbah ka jylla – Himanta Biswa Sarma lem bad ka sorkar jong u ki dang shim ïa ki lad ki lynti ban wanrah ïa ka shong suk shong saiñ ha ka thaiñ Bodoland Territorial Region (BTR) lyngba ka jingsoi ïa ka soskular BTR Accord kaba lai (3).
Ïa katei ka soskular la ïasoi hapdeng ka sorkar Assam bad ka National Democratic Front of Bodoland ha ka 27 tarik u Kyllalyngkot jong u snem 2020.
Kum ban shu ïathuh hangne, dang ha u snem ba la dep sa kawei ka seng kieng atiar kaba la tip kyrteng kum ka United Liberation of Bodoland (ULB) ka la mih pyrthei ha ka jylla Assam.
