E. S. Ajar, Nongthymmai
Ha ri Khasi jong ngi ne ha ka bri u Hynñiewtrep ym ju don jingiasngewpher jaidbynriew. Ia u dohiong ki ong u Khasi, ia u dohlieh ruh ki Khasi, dohstem ruh bad dohsaw u Khasi. Hangno ngin shem ba u Khasi, ki Seng Bhalang ne u riewshimet ba u pyniapher jaidbynriew. Hangne ki kdup lut ia baroh, ym dei tang katta ki kam bahaiing, ki kam kur kam mama bad kam kynum ruh kat ia uba ki iakynduh, namar ba ki ieit palat ia ki para briew, la uba iong ne uba lieh kam pher. Hangno ju shem kum ka ri jong ngi kiba kdup bad ai jaka lut kat ia uba pher. Lada ngin phai na kawei pat ka liang, ka jaidbynriew jong ngi ka la sbun shaba palat u pud, kat haduh ba ki kham ki kti lajong kin jot bad iap tyrsaw, namar ba la laitlan palat. Lada ka don kum kata ka jingsngewiapher jaidbynriew, nangno pat mih ki jaidbynriew ki bym lah khein shuh, khamtam ha ka Greater Shillong, la bun paid da u bar jylla haduh ba ki trai shnong trai ri trai muluk u la long Minority (ritpaid).
Ki khun ki kti kim ioh kam ioh jam shuh ha ka sorkar (Sorkar Jylla ne Sorkar Pdeng) namar la knieh lut da kiwei pat ki jaidbynriew, ha ka khaïi ka pateng (business) ruh la jyllei da kiba nabar (outsiders) peit ha Iewduh, ka Iewduh ka iew u Khasi, mynta pat bun paid mano? U trai ha kyndong u bar jylla ha Bangla. Hato don mo kata ka jingsngewiapher jaidbynriew ha ri jong ngi?
Nga kyrpad ia ki nongmihkhmat, ba kin ym klet ia ka jylla lajong – ngi long ki ritpaid ha ka pyrthei India – ngi long tang shi kham hakhmat ka ri baheh bad iar. Namar ka ri jong ka jylla hi baroh kawei ka la tmier – ka umsaw la ha shyntur, lada ym don ba kitklieh kata ngi la ngam jyllop.
Ia ki hok ba ka longbriew manbriew, ban im ban kren, ban iada, la kyrshan da ka Constitution of India.
Ha ka por ba ngi iakhih jylla lajong ne Hill State, kiwei pat ki jaidbynriew ki khlem wan kyrshan lang ia ngi, dei tang ki paralok Garo kiba la iashim bynta lang. Haba ngi iakhih jylla la jong ngi pyrta ‘We want Hills State, No Hills State No Rest.’ Kane ka Hills State ne jylla lajong – la dawa tang na ka bynta ki trai (indigenous people) kiba shong ha kine ki lum baieit jong ngi, ngi khlem dawa na ka bynta kiwei pat ki jaidbynriew (Khasi Hynñiewtrep bad Garo). Haba ngi leh kumta, kam mut ba ngi isih ne sngewiapher jaidbynriew. Ban leh kumta ka long kaba dei eh ym kaba sngew bad kaba pyrshah ia kiwei pat ki jaidbynriew. Ka ktien U Blei ka iathuh ba ki Israel ruh ki iada ialade (preserve), kim kwah ban iapoi kha khleh, kane kam dei ka pop bad kam dei hi ruh ka jingsngewiapher jaidbynriew.
Ka jingjied jaidbynriew u Hynñiewtrep jong ngi ka la long palat – kat haduh ba u trai um idon jaka ne jingkyrmen shuh. Hato kane kam long pop ? Lada ngi kdup ia kiwei pat ki jaidbynriew kat haduh ban da jot ki khun ki kti bad ka jaidbynriew lajong ruh.
