Agartala, Jylliew:
Ki la don kumba 7 ngut ki briew, kynthup ïa arngut ki khynnah rit, kiba la ïap bad kumba 16 ngut kiwei pat ki la mynsaw na ka jingshah bat ding ilektrik ha Unakoti distrik kaba don ha Tripura ha ka sngi Balang.
Kumba la ïathuh ki pulit, la ong ba kane ka jingjia ka la jia ha ka por ba dang don ka jingïaid riewblei ka “Ulto Rath”, ka jingrakhe ïa ka jingwanphai jong u blei ki Hindu u Jagannath bad arngut kiba shi para bad u hadien ka jingdon jong ka Rath Yatra kaba ju pynlong manla u snem.
Kane ka jingjia ka la jia haba ka jaka ba la rah ïa u durmot blei thaw kaba la shna da ki nar ka la leit tyngkhuh ha u Wire ba don najrong ka lynti ïaid bad nangne ka la jia ka jingshah bat ding ilektrik ha kaba ka la shim ïa ka jingim jong ki 6 ngut hashen bad uwei pat u la khlad ha ka lynti ban pynpoi sha ka jaka ai jingsumar.
Ïa ki briew kiba la mynsaw la pynkit sha ka jaka ai jingsumar, ha kaba la ong ba kiba bun na kine ki la don hapdeng ka jingshitom kaba jur. Na ka liang ki pulit ki la pynlong ïa ka jingtohkit kaba bniah halor kane ka jingjia.
