New Delhi, Jylliew:
Ka kynhun National Investigation Agency (NIA) ka la phah shuh ka jingmudui pyrshah halor ka jingdonkti jong ka kynhun CPI (Maoist) ne Naxal ban thong pisa ha kaba ïadei bad ki jingthmu ban pynjur ïa ki kam pyntriem jong ki lehnoh kum shi bynta ban thmu pynkhie im biang ïa ka kynhun lehnoh ha Magadh Zone jong ka Bihar.
Ïa kane ka jingmudui la phah hakhmat ka Special Court jong ka kynhun NIA kaba don ha Ranchi pyrshah ïa u Abhinav ba la tip ruh da ka kyrteng kum u Gaurav Kumar bad kum u Bittu uba dang 22 snem ka rta, u nongshong shnong jong ka Aurangabad distrik kaba ha Bihar. U Abhinav, uba la shahkem ha ka 3 tarik, Kyllalyngkot jong une u snem, u la shah pynngat ha kiba bun ki kyndon jong ka Indian Penal Code and Unlawful Activities.
Ka NIA ka la ïoh ban kem ruh ïa u briew uba saw uba la shah kynnoh donkti ha ka jingjia jong ka jingthong pisa ban pynjur ïa ki kam pyntriem jong ki lehnoh ka kynhun CPI (Maoist), la ïathuh ki heh jong ka kynhun tohkit ha ka jingïakren bad ki nongthoh khubor ha ka sngi Ba-ar.
Ka kynhun NIA, ha ka jingthoh ba ka la phah hynnin ka sngi, ka la pynshisha ba une u briew uba la shah kynnoh u la shahkem ha ka sngi Thohdieng halor ka jingthmu jong u ban pynkhie-im biang ïa ka kynhun kaba la shah ñiew beaiñ ha Magadh Zone jong ka Bihar.
Kine ki jingthmu jong u ki long ban ai mynsiem bad ban khring ïa kiba bun ki briew ban ïoh pynrung dkhot hapoh ka kynhun bad ban pynjur ïa ki kam pyntriem kumba la thmu da ki nongïalam.
Kumba la ïathuh ki heh jong ka kynhun, NIA, la ong ba une u briew uba la shah kynnoh u dei uba la tip kyrteng kum u Anandi Paswan ïa uba la tip ruh da ka kyrteng kum u Anand Paswan (46) une u la shah mudui ha kaba ïadei bad san tylli ki jingjia ïa kiba la buh jingujor ha kiba bun tylli ki jaka treikam jong ki pulit ha Bihar.
“Ki la don ki jingleit khynra kiba hashwa sha ki jaka sah bad ki jaka treikam jong u Anandi, uba dei u nongshong shnong jong ka Nirakhpur kaba don ha ka thaiñ Kinjar jong ka distrik Arwal, Bihar, bad na kane ka jingpyntreikam la ïoh ban kurup ïa ki tiar siat bad ki tiar pynbthei kaba la long ha ka 12 tarik, Rymphang 2022,” la ïathuh u heh jong ka kynhun NIA.
