Agartala, Naitung:
U Myntri Rangbah jong ka Tripura u Manik Saha u la buh ïa ka hukum ba la dei ban pynlong da ka jingtohkit kaba bniah ha ka por ba don ka jingïaid riewblei na ka jingrakhe ïa ka jinglehniam ‘Ulta Rath’ ha Kumarghat kaba don ha Unakotidistrik ha ka sngi Balang.
Ha kaba ïadei bad kane ka jingjia, ki la don kumba 7 ngut ki briew, kynthup ïa lai ngut ki khynnah bad lai ngut ki longkmie, kiba la shah bat ding ilektrik haduh ba kin da ïap katba 16 ngut kiwei pat ki la mynsaw. U Myntri Rangbah u la leit jurip bniah ïa katei ka jaka ba la jia ka jingjia, ha kaba u la khmih bniah ïa ki jinglong jingman bad pynbna ruh ka bailutksan kaba mar T. 4 lak sha ki bahaïing jong kine kiba la ïap ha kane ka jingjia.
Na ka liang ki pulit mynta ki la sdang ban pynlong ïa ka jingtohkit khnang ban lap ïa ki daw tynrai ha kaba ïadei bad ka jingjia kaba la shim ïa ka jingim jong kine ki briew bad pynmynsaw ïa kiwei pat.
Ha kaba ïadei bad kane ka jingjia, na ka liang u Myntri Rangbahduh u Narendra Modi u la pynbna ka bailutksan kaba mar T. 2 lak sha ki bahaïing jong kine ki lanot.
