Washington, Naitung:
Ka tnat pulit jong ka Baltimore ka la pyntip ba ha ka Sngi U Blei, 2 ngut ki briew ki la khlad bad kumba 28 ngut pat ki la mynsaw na ka jingsynreit kuli naphang hapoh ka nongbah Baltimore jong ka United States.
U Acting Police Commissioner jong katei ka jaka, u Rich Worley, ha ka janmiet Sngi U Blei u la iathuh ba ki pulit ki la ioh ia shibun tylli ki jingpyntip halor katei ka jingjia ha ka por kumba 12:30 jong katei ka step Sngi U Blei ha kawei ka jingïaleh sngewbha ha ka surok bah jong ka thaiñ Brooklyn hapoh Maryland.
Hynrei la ong ba hadien ka jingleit poi jong ki heh pulit sha katei ka jaka, la shem sa tang ia ki metïap bad kumjuh ruh kito kiba la mynsaw bad thiah lyngkrang ha katei ka jaka.
Napdeng kitei kiba thiah iap ha katei ka por, ki pulit ki la shem ia kawei ka kynthei 18 snem bad kumjuh ruh ia u shynrang ba 20 snem ka rta, kiba la iathiah iap ha katei ka jaka.
Katba, ia kitei kiba mynsaw baroh pat la pynkit bad sumar sha ki jaka sumar kiba don hajan jong katei hi ka thaiñ, ha kaba 3 ngut napdeng jong ki, ki dei kiba la mynsaw jur bha bad ka jingim jongki ka la don hapdeng ka jingma kaba khraw.
Katei ka jingjia ha kane ka kynti, ka long ka jingjia kaba shyrkhei tam ha kane ka por hadien ki katto katne ki jingjia synreit kuli naphang kiba ka US ka la ioh mad ha ki khyndiat por ba la leit.
U heh ka Baltimore, u Brandon Scott, ha ka jingiakren bad ki lad pathai khubor, u la pynrem jur halor katei ka jingjia bad ka jingsynreit kuli dusmon jong kino- kino ki runar kiba don kti ha katei ka jingjia bad u la ong ruh ba ka hok kan sa bishar ia ki bad kin hap ban mad ia ki jingpynshitom jong ka aiñ katkum ki kyndon pynkheiñ aiñ ba la buh. Shuh shuh ruh u la ong ba kane ka long ka jingjia kaba sniew bok tam, ka bym shym dei ban jia ne urlong.
Kumjuh ruh u Scott u la ong ba kane ka long ka daw bah ia ki bor pyniaid ka United States ba ki dei ban pyrkhing bad buh da ki kyndon aiñ halor ka jingthied bad ka jingbuh suloi jong ki longiing hapoh ka ri, kum shi bynta ban tehlakam ia ka jingkynrei ki kam thombor bad ki jingjia synreit kuli naphang kumba la sakhi ha kine ki sngi.
Kumta ruh u la ong ba, ki bor pyniaid ha kum kane ka por, kin ym shu sngap mynthi ne shong kli kti ban pyllait suk ia kitei ki nongleh kam sniew bad ki runar kiba shim ia ka jingim ki riew paidbah khlem jingkheiñ snep eiei, hynrei kin thwet bad buddien haduh ba kin da ioh ia kitei kiba don kti baroh bad kin hap ruh ban mad ia ki jingpynshitom bad ki aiñ ba iadei bad ki jingleh pynkheiñ aiñ jongki.
Namar ka jingioh bat suloi laitluid jong ki paidbah hapoh United States, shibun tylli ki jingjia synreit kuli ki la jia hapoh ka ri ha kine ki sngi, ha kaba ki don palat 44,357 ngut kiba khlad ha kitei ki jingjia ha US hapoh jong u snem 2022, kynthup ia 24,090 ngut kiba bthat hi ia la ka jingim bad kane ka long katkum ka kaiphod ba la ioh lum da ka tnat Gun Violence Archive (GVA).
Katei ka jingsynreit kuli naphang ha ka Sngi U Blei, ka long ka sien ba 337 ba ka United States kan ioh mad tang hapoh jong une u snem.
