Islamabad, Jymmang:
Katkum ki khubor, la ong ba kawei ka kali ‘Auto Rickshaw’ ka la bthei ha kawei ka iew paidbah kaba don sha ka thaiñ Shatei Lam Mihngi jong ka Pakistan ha ka Sngi Ba-ar, ha kaba, 9 ngut ki la khlad na katei ka jingjia bad da ki phew ngut kiba ngat bad mynsaw ha katei ka jingjia, la iathuh ki pulit, kum ka dak ba khatduh jong ka jingjur jong ki jingkulmar ha katei ka thaiñ kaba don ha markhap bad ka Afghanistan.
Katei ka jingbthei, ka la jia ha Lakki Marwat, ka District kaba don hapoh ka Jylla Khyber Pakhtunkhwa, ong U Azmat Ullah, u heh pulit katei ka thaiñ. U la ïathuh ruh ba napdeng jong kitei kiba khlad, la kynthup lang ia 2 ngut ki pulit pynïaid kali bad kawei ka longkmie.
Ym don kano kano ka kynhun kaba la kam trai ne shim jingkit khlieh haba iadei bad katei ka kam thombor, hynrei ka jingsuba, ka lah ban hap ha ki kynhun Taliban jong ka Pakistan, kiba la tip kum ka Tehrik-e-Taliban Pakistan, lane TTP. Kane ka kynhun ka long kaba kyrpang na hynrei ka ïatreilang bad ka sorkar Taliban jong ka Afghanistan bad ka la pynjur ïa ka jingïakhun pyrshah ïa ki bor pahara jong ka Pakistan ha kine ki snem ba la dep.
Kane ka jingshah thombor ba khatduh ka la jia katto katne sngi hadien ba 15 ngut ki ophisar pulit ki la ïap ha ka jingshah pynbthei bom bad shah thombor da ki suloi ha kawei ka jaka pahara ha ka Bannu district ba marjan, kaba la pynlong ïa ka Islamabad ban khot ïa uwei u heh nongmihkhmat jong ka Afghanistan ban ujor da ka ejahar kaba pura.
Ka Pakistan ka la kynnoh ïa ka TTP halor ka jingshah thombor ha ka por janmiet jong ka sngi Saitjaiñ.
Ki bor synshar jong ka Pakistan ki la kynnoh slem bha ïa ka sorkar Taliban jong ka Afghanistan ba ka ai jaka rieh ïa ki ehrang TTP. Ka Kabul, ka la kyntait ia katei ka jingkynnoh, da kaba ong ba kam shah ia ki lehnoh, ba kin pyndonkam ia ka khyndew jong ka Afghan, na ka bynta ban thombor ia kiwei pat ki ri.
Ka Pakistan ka la sakhi ïa ka jingkiew jong ki kam thombor jong ki lehnoh ha kine ki snem ba la dep, kaba la pynjynjar ïa ka jingïadei bad ka Afghanistan.
Ka TTP bad kiwei ki seng lehnoh ki la nang shlur shuh shuh naduh ba ki Taliban Afghan ki la wanphai biang ha ka bor synshar ha Kabul ha u snem 2021.
Ka jingïakynad hapdeng ka Pakistan bad ka Afghanistan, ka dang ïai bteng, kynthup ïa ki jingïakhun, kiba la pynïap da ki spah ngut ki briew, naduh ba kut jong u bnai February. Ha kaba sdang jong u bnai Risaw, ki arliang mamla ki la pynlong ia ka jingiakren iasuk kaba la pyniasuk da ka China. Hynrei ki jingïakynad ba man ka por ha ki pud ki dang ïai bteng, watla ha ka jingkhlain kaba kham duna ban ïa kaba mynshuwa.
