Washington, Jymmang:
U Secretary kam bar ri jong ka US, u Marco Rubio, u la batai ïa ka China, kum ka jingeh kaba ha khlieh duh jong ka America ha ka liang ka saiñpyrthei bad ong ruh ba ka jingïadei bad ka China ka long kaba kongsan tam ia ka US bad kaba donkam ruh ban pynbeit bha noh ha shwa jong ka jingïakynduh jong U President Donald Trump, bad U Xi Jinping, nongïalam jong ka China. U Rubio, uba la synran lang ia U Trump, ha ka jingleit jngoh jong ka ri China, kaba 2 sngi, ula khot ruh ia ka Beijing, ba kan shim ia ka bynta kaba kham tyngeh, na ka bynta ban pynkut noh ia ka thma ha Iran.
U Secretary of State u la ong ba ban lait na ki thma bad ban pynneh ia ka shongsuk shongsain ha ka pyrthei, ka America kan hap ban pyniaid ia ki jingmyntoi kiba ia tyngkhuh hapdeng ki ar tylli ki ri kiba heh ha ka pyrthei.
“Ki lah ban don katto katne ki bynta jong ka jingiatreilang ruh, bad ngi kwah ban pynthikna ba ngin ym iaid jngai na kita,” u la bynrap.
