Washington, Jymmang:
Ka United States ha ka Sngi Nyngkong, ka la pynngat kyndon ia 12 ngut ki riew shimet bad ki nongiadon bynta ha ka jingkhaii bad jingpyniaid ia ka umphniang Iran sha ka China bad kane ka long ruh tang hadien katto sngi ba la pynbeit ia ka jingleit jurim jong u President ka US sha China.
Ha ka jingpynbna, ka tnat pla tyngka jong ka US ka la kynnoh ba ka kynhun pahara jong ka Iran (IRGC) “ka shaniah ha ki kompeni ba shakhmat ha ki jaka ba ailad ban pynthut ia ka bynta jongka ha ka jingdie umphniang bad ban pynpoi ia ka jingmih sha ka sorkar Iran.”
Ka la jer kyrteng ia 3 ngut ki riew shimet kiba sah ha Iran bad hynniew tylli ki kompeni – kiba don ha Hong Kong bad United Arab Emirates – kum kiba hap ha ki jingpynjari ba thymmai.
Ki tnat ba la shah pynjari kin ïohi ba kino kino ki mar ki mata kiba don ha US kin shah khang, ha kaba baroh ki jingïadei bad ki da ki tnat bad ki riew shimet jong ka US ruh kin shah khang.
Kum shi bynta jong ka thma pyrshah ïa ka Iran, ka America ka la pynjur ïa ki jingpynjari pyrshah ïa ka sorkar Tehran bad ka IRGC ha ka jingpyrshang ban pynthut ïa ki ha ka liang ka ioh ka kot.
“Katba ki shipai jong ka Iran ki dang pyrshang da kaba tyngeh ban pynïasoh biang, ka Economic Fury kan dang bteng ban pynduh ïa ka pisa jong ka sorkar na ka bynta ki prokram tiar jong ka, ki proksi jong ki lehnoh, bad ki jingthmu nuclear,” ong u myntri pla tyngka jong ka US, u Scott Bessent, haba kdew ïa ki lad kamai ba ka US ka pynbor ïa ki shipai Iran.
Ka thma ka la pynkhihwin ïa ki iew bor ding ha ka pyrthei, ha kaba ka Tehran ka la khanglad ïa ka duriaw bah jong ka Hormuz, lyngba kaba jan shi bynta na ka san bynta jong ka umphniang bad ka gas ha ka pyrthei ka tuid man ka por.
Ka Washington ka la pynjem ïa ki katto katne ki jingpynjari ïa ka umphniang Iran ha u Risaw ha ka jingpyrshang ban weng ïa ka jingduna ha ka pyrthei, hynrei naduh katei ka por ka la pynkhlaiñ biang ïa ki jingkhang.
Ka umphniang kaba bun jong ka Iran ka leit sha Asia, ha kaba ka China ka dei ka nongwanrah umphniang kaba kongsan. Ka Beijing ka dei kawei na ki paralok khaii ba heh tam jong ka Tehran ha ka jingïalang baroh kawei.
U President jong ka America, u Trump, un leit sha Beijing ha kaba kut jong kane ka taiew, na ka bynta ka jingiakren ba kongsan bad u nongialam ba hakhlieh duh jong ka China- u Xi Jinping, ha kaba ka jingiakren kaba pura, ka don ha ka mat jong ki jingiakajia khaïi- pateng.
Ka thma jong ka US-Israel pyrshah ïa ka Iran ruh kan long kaba ha khlieh duh, ha kaba ka Washington kan wad ïa ka jingpynbor kaba kham khraw ïa ka Tehran na Beijing.
Ka tnat kam bar ri jong ka US, ka la pynjari ia lai tylli ki kompeni satellite kiba don ha China, ha ka sngi Palei, namar ba ki la pynlah ia ki kam shipai jong ka Iran.
Ka tnat pla tyngka jong ka US, kham mynshwa, ka la pynjari ïa ki katto katne ki kompeni kiba don ha ka ri China bad Hong Kong, namar ba ki la ïarap ïa ka Iran ban pynpoi ïa ki tiar ïaleh.
