Washington, Jymmang:
Katkum ka jingbuh jingkheiñ jong ka kynhun ba dei khmih ia ka mang tyngka jong ka Congress , la ong ba “Golden Dome” jong u President jong ka US, ka lah ban shongdor haduh 1.2 trillion dollar ha ki 20 snem.
“Na ka mang tyngka kaba $1.2 trillion, ka jinglut ban thied… kan long palat $1 trillion. Kata ka pisa ka kynthup ïa ka jinglut naka bynta ki bynta ba kongsan jong ka system, naduh ki bynta ba khanglad bad ka rukom ai jingmaham bad buddien ïa ki namding kiba don ha suiñbneng,” ong ka CBO ha ka kaiphod.
“Ka bynta kaba rem dor tam ka dei ka syrtap jong ka jingpynkylla kaba don ha ka suiñbneng, kaba don kumba 70% na ka jinglut ha kaba thied bad 60% na ka jinglut baroh,” ka la ong. Ka jinglut kaba pdeng man la u snem na ka bynta ki jingtreikam bad jingkyrshan kan wan ha ka por ba $8.3 klur, la ong ka kaiphod.
U Trump u la bthah ïa ka Pentagon ban shna ïa ki mat ba kongsan na bynta ka ‘high-tech missile defence shield’ ha kaba kut u Kyllalyngkot jong u snem 2025, ha kaba nyngkong u la ai kyrteng ïa ka “Iron Dome for America.”
Ha u Jymmang 2025, U Trump, u la pynbna ba la mang $25 billion na ka bynta katei ka projek, ha kaba ka jinglut baroh kan long $175 billion.
Hynrei ka CBO ka la ong ha u juh u bnai ba ka jinglut jong ki tiar pynbthei kiba don ha suinbneng ban jop ia ki namding ba rit kiba don hapdeng ki ri ka lah ban long hapdeng $161 klur bad $542 klur ha ki 20 snem.
