New Delhi, Naitung:
Ka jingïalang jong ki seng ka liang pyrshah ïa kaba la thmu ban pynlong ha ka 13 tarik haduh ka 14 tarik, Naitung ha Bengaluru ka la shah pynkynriah noh bad la rai ban pynlong ïa ka hadien ba la dep ban pynlong ïa ka dorbar lyiur ha ïingdorbar, la ong u heh nongïalam jong ka seng JD(U) u KC Tyagi.
Ïa ka tarik ban pynlong ïa ka jingïalang jong ka kynhun pyrshah yn sa pynbna kham hadien.
Na ka daw jong ka jingdon ka dorbar lyiur jong ka Bihar Assembly kaba la thmu ban pynlong ha ka 10 tarik haduh ka 24 tarik, Naitung, la pynkynriah noh ïa ka jingïalang. Kumba la ïathuh ka tyllong khubor, la ong ba ka seng JD(U) jong u Nitish Kumar ka la bthah ïa u President jong ka Congress u Mallikarjun Kharge ba un pynkynriah noh ïa ka jingïalang naba ma u bad u Tejashwi Yadav kin sa bunkam bha ha kaba ïadei bad ka jingdon jong kane ka dorbar ha ïingdorbar.
Ki khubor jong ka jingthmu ban pynkynriah noh ïa ka jingïalang ka la long hadien ka jingmih jong ka jingïapait hapoh ka seng Nationalist Congress Party (NCP), hadien ka jingpynibor pyrshah jong u Ajit Pawar ïa ka seng bad leit ban ïatreilang bad ka sorkar u Shinde bad BJP ha Maharashtra.
