Guwahati, Naitung:
Ki la don kumba 7 ngut ki briew kiba la shahkem halor ka jingthmu ban wanrah ki kam pyntriem da kaba dawa pisa ha ka kyrteng jong ki kynhun lehnoh, la ïathuh u heh pulit jong ka Assam.
Ïa kine ki briew la kem na Assam, Nagaland bad West Bengal, u la bynrap. U Director General of Police u G P Singh ha ka jingphah jingthoh jong u lyngba ka Twitter u la ong:
“Ki pulit jong ka Assam ki la lah ban pyntroiñ ïa baroh kawei ka kynhun jong ki runar kiba la thmu ban leh ïa ki kam pyntriem ha ka kyrteng ki lehnoh ha kaba ki la thmu ban leh ïa ki kam dawa pisa ha ka kyrteng jong ka seng KLO bad BLA ha ka thaiñ BTR jong ka Assam. Ki la don baroh 7 ngut kiba la shahkem na ki bynta ba bun jong ka Assam, Nagaland bad West Bengal.”
U Singh u la pynsaphriang kylleng ïa ka Letterhead jong ka Boro Liberation Army (BLA), kaba ym pat pynshai lada la don ne em kiba la ïoh na kine ki briew kiba la shahkem.
Um shym la batai shai la kane ka kynhun kaba la shah pyntroiñ ka la don ne buh da kawei pat ka kyrteng na ka bynta jong ka.
Nalor ka BLA, ka kynhun ki runar ka la dawa pisa ha ka kyrteng jong ka Kamatapur Liberation Organisation (KLO). Napdeng kine kiba la shahkem, lai ngut ki dei na Udalguri distrik, arngut na Karbi Anglong bad mar uwei na Darrang bad Tamulpur.
