Imphal, Naitung:
Naba ki kynrum kynram ki dang ïai bteng ha kiba bun ki bynta jong ka Manipur, ka sorkar jylla ka la rai ban bteng ïa ka jingkhang ïa baroh ki skul haduh ka 8 tarik, Naitung.
Ka hukum ka la ong kumne, ” Ka jingsdang biang ïa ki klas na ka bynta baroh ki skul ha ka jylla, kumba la pynmih hukum katkum ka tarik ba la buh kata ha ka 19 tarik, Jylliew, 2023, la thmu ha ka 8 tarik, Naitung haduh ban da pynbna da kumwei pat.” “Baroh ki Zonal Education Officer hapoh ka Department of Education-Schools, Manipur ki la shah hukum ba kin pyntip sha baroh halor kane, bad ban shim ki jingpyntreikam kumba dei ban long,” la ong ka hukum ba la dep ban phah.
Ïa kane ka hukum la pynmih da ka jingmynjur jong ka sorkar katkum ka shithi kaba don ïa u No. MISC5-10/1/2023 EDN (S)-EDN (S) kaba ha ka 30 tarik, Jylliew, 2023, u la bynrap.
Ki pulit jong ka Manipur ha ki khyndiat sngi jong ka taïew ba la lah ki la ong ba ki jinglong jingman ha kiba bun ki distrik ki la sdang ban jai jai bad ïaid beit ïaid ryntih lait noh tang ha ki katto katne tylli ki jaka ba la mih ki jingïasiat.
Ka jingïakynad bad ka jingïaumsnam ka la don hapoh ka jylla lajan ar bnai kata naduh ka 3 tarik, Jymmang ha kaba ka la mih na ka jingpynlong ïa ka jingïalang paidbah ba la pynlong da ka All Tribal Students Union (ATSU) ban ïakhih pyrshah halor ka jingdawa jong ki Meitei ban kynthup ha ka thup jong ki Scheduled Tribes (STs).
