Guwahati, Risaw:
Ki pulit jong ka Lakhimpur, ki la kem ïa 25 ngut ki briew, ha ki jingkhynra pyrshah ïa u drok, kiba la pynlong ha kylleng ka distrik, naduh ka step jong ka lah sngi U Blei, kum shi bynta ban pynshitom jur ïa ka jingkhaïi drok.
Ha kawei na ki jingkhynra, ki pulit ki la kem ïa 5 ngut ki briew na No. 2 Ahmedpur hapoh jong ka Bihpuria Police Station bad ki la ioh ban kurup haduh 12.23 gram u drok ba la suba ba u dei u drok Heroin. Kine kiba la shah kynnoh ki dei kiba la tip kyrteng kum u Wasim Akram, Aminul Islam, Nizamuddin Ahmed, Mohd. Ali and Mohd. Abduz Ali.
Ha ka jingkhynra ba kyrpang ha ka thaiñ Harmutty kaba hap hapoh jong ka Laluk Police Station, la kem ïa saw ngut ki briew halor ka jingkynnoh ba ki donkti ban bat bad die ïa ki jingdih pynbuaid ba la khang pyrshah. Kine ki arngut ki dei kiba la tip kyrteng kum u Ruhul Amin, u Deepak Biswas, u Sabdul Ali bad u Raju Khan.
Ha kajuh ka por, ki pulit ka North Lakhimpur ki la kem ïa arngut ki briew kiba la tip kyrteng kum u Ganesh Bora bad u Gopoiram Borah na ka thain Bodhakora halor ka jingkynnoh ba ki don ïa u Ganja. Ki jingkem ki long shi bynta jong ka jingïakhun pyrshah drok kaba kham heh kaba la pynlong ha kylleng ki jaka treikam jong ki pulit ha ka distrik Lakhimpur. Ïa ki jingtip ba bniah ha kaba ïadei bad ki jingshah kem bad ki jingshah kurup kiba dang sah kim shym la lah ban ïoh mardor.
