C. B. Iawphniaw
Kano kano ka rukom leh jong ngi ki briew ka don beit ka jingsniew bad ka jingbha. Kiba ai jait kpa ki don bun kiba kit khunrei, kiba ai jait kmie ruh ki don bun kiba kit khunrei. Balei kane ka kit khunrei ka kynrei ha ngi ki Khasi, ka daw lehse namar bun ki longkpa kiba ïap shiteng por. Kumta ki longkmie ki hap kit khunrei. Kumjuh kiba ai jait kpa bun ki longkmie kiba kit khunrei namar ki longkpa ki ïap khlem pat dei por. Kane ka jia ha baroh ki jaitbynriew bad ym tang ha ngi ki khun Khasi khara. Kumta ka sang ka ma ruh ka don beit ha baroh ki jaitbynriew ha satlak ka pyrthei. Ka sang ka don ha kano kano ka jaitbynriew ruh. Ka ïaleh markynti ruh ka don ha baroh ki jaitbynriew ka pyrthei. Haba phai sha ka ktien U Blei ruh ka don kumba ïa bna kylleng ba don ka jingshong sang hapdeng jong phi bad kat kata ka jingshong sang kam ju don wat hapdeng ki Jentil ruh, ba uwei u la ioh ia ka tnga u kpa jong u (I – Korinth 5 : 1). Kumjuh ka la jia ha kita ki khun kynthei u Lot baroh arngut ki la pun-khun na u kpa jong ki hi (Jenesis 19 : 36). Te ha ngi ki Khasi kiba ai jait kmie ruh ka don beit ka jingshong sang. Kam dei ka jingkynnoh ne phareb ba ka ai jait kpa ka ialam sha ka sang ka ma. Namar ka ai jait kmie ruh ka don beit ka shongsang. Ki tymmen Khasi mynshuwa ki ong haba phi shong sang to sumar ioh un pom u pyrthat bad un dait u khla. Kane ka pyni ba ka don beit ka shong sang ha man ki jaitbynriew.
