Shillong, Nailar 01:
U Myntri Khynnah ka tnad kam pohïing ka Sorkar Pdeng, u Nityanand Rai u la ong ba kim don kino-kino ki jingbuh kyndon haba ïadei bad ka jingpynrung ïa kano-kano ka Ktien ha ka Khyrnit ba 8 ka Riti Synshar ka Ri.
U Rai u la ong ïa kane haba jubab ïa ka jingkylli halor ka jingdawa ban pynrung ïa ka Ktien Khasi ha ka Khyrnit kaba 8 ka Riti Synshar ka Ri ba la wanrah da u MP na Shillong Parliament Konstiwensi ha Lok Sabha ha ka Sngi Ba-ar.
“Ki la don ki jingdawa na ka por sha ka por haba ïadei bad ka jingpynrung ïa katto-katne ki ktien jong ka ri hapoh ka Khyrnit ba 8 ka Riti Synshar ka Ri ba kynthup ïa ka Khasi. Hynrei kim shym don kino-kino ki jingbuh kyndon haba ïadei bad kano-kano ka Ktien na bynta ban pynrung ha ka Khyrnit ba 8 ka Riti Synshar ka Ri,” la ong u Myntri Khynnah.
U la ong ruh ba ka jingpyrshang ban buh ïa kiba kum kitei ki kyndon lyngba ki komiti ka Pahwa bad Sitakant Mohapatra kim shym la poi sha kano-kano ka rai.
“Namar ka jingroi jong ki ’tien shnong bad ki Ktien ka dei ka kam kaba kylla na ka por sha ka por la ha ka liang ka imlang-sahlang, lariti, ïoh ka kot bad ka saiñ pyrthei, ka long kaba eh ban buh kano-kano ka kyndon na bynta ka jingpynrung ïa ki Ktien ha ka Khyrnit ba 8 ka Riti Synshar ka ri,” u la ong.
Ha kajuh ka por, u Rai u la ong ba ka Sorkar ka sngewthuh ïa ki jingsngew bad jingdonkam na bynta ka jingpynrung ïa kiwei-kiwei ki Ktien ha ka Khyrnit ba 8.
“Hap ban pyrkhat bha ïa kine ki jingkyrpad da kaba buh jingmut ïa kine ki jingsngew lem bad kiwei-kiwei ki bynta,” u la ong.
Shuh shuh halor ka jingdon ki briew kiba kren ïa ka Ktien Mizo, u Myntri Khynnah u la bynrap ba katkum ki jingtip na ka kaiphod khana samari u snem 2011, ka jingdon ki briew kiba kren ïa ka Ktien Mizo ha India ka long 8,30,846.
