Shillong, Risaw 23
Ka lympung ïalehkai 5th KIO North East Zone Karate Championship 2026 ka la sdang ha ka Thohdieng ha Convocation Hall jong ka skulbah North Eastern Hill University, Shillong ha kaba la wan shim bynta da palat 900 ngut ki nongïalehkai.
Ïa kane ka lympung la plie da u Myntri ka tnat ïalehkai ka Sorkar Jylla u Bah Wailadmiki Shylla ha kaba la ïadonlang u President ka Karate India Organisation (KIO) u Bharat Sharma, kumjuh ki nongïalam ka Meghalaya State Olympic Association ba kynthup ïa u Working President Bah Jonh F. Kharshiing, u General Secretary Bah Finely Pariat bad kiwei kiwei.
Ïa kane ka lympung la pynlong da ka Meghalaya Karate-Do Association (AMKA) ha ryngkat ka jingkyrshan lang da ka tnat ïalehkai ka Sorkar Jylla. Kane ka long hadien 30 snem ba ka Jylla Meghalaya ka la ïoh ban pynlong biang ïa kane ka lympung.
Ha kane ka lympung ïalehkai kaba ar sngi kynthih, la wan shim bynta da palat 900 ngut ki nongïalehkai na ki hynñiew tylli ki Jylla ka thaiñ shatei lammihngi kynthup ïa ka Meghalaya, lait noh tang ka Mizoram ka bym shym la wan shim bynta. Te kumta ka Meghalaya ka la sei ïa ka kynhun kaba don 292 ngut ki nongïalehkai kynthei bad shynrang.
Kane ka lympung ka dei kaba kongsan namar ki nongjop na kane ka lympung, kin ïoh rung sha ka KIO Inter-Zonal Karate Champion-ship 2026, ka ban sa long ha New Delhi ha ka 16 haduh 17 tarik u Nongprah mynta u snem 2026.
Ha kane ka sngi sdang ka Meghalaya ka la khur katto katne tylli ki takma ha ka kata (demonstration), katba ka Kumite (sparring) ka la bteng kham hadien.
Na ka liang u Bah Wailadmiki kum u kongsan u la pynpaw ka jingsngewkmen ban shah pynkup burom da ka black belt (1st dan) ha u President ka KIO u Bharat Sharma. “Ngam shym la poi pyrkhat ban shah pynkup burom da ka kyrdan black belt namar kum ki nongïalehkai ki sngewthuh ba shim por da ki snem ban ïoh ïa kane ka kyrdan kaba kyrpang. Ngan pyrshang ban ai ka jingkyrshan pura na katei ka synjuk ïalehkai karate bad ban plie ïa ki nongïalehkai.”
U Bah Shylla u la ai ka burom sha u Myntri Rangbah ka Jylla u Conrad K Sangma halor ki jingkyrshan pisa ban kyntiew ïa ki jaka ïalehkai bad kumjuh na ka bynta ki nongïalehkai ha ka Jylla. U la ai ka jingïaroh ïa ki dkhot ka AMKA halor ka jingtrei shitom bad ka jingaiti lut met bad mynsiem ym tang ha kane ka lympung, hynrei ïa baroh na kawei ka snem sha kawei pat.
“Ha ka por ba nga la shimti kum u Myntri ka tnat ïalehkai, nga la ïohi ba ka AMKA ka long kawei na ki synjuk kaba trei shitom ha ka Jylla. Nga kyrmen ban kin pynlong ïa kum kine ki lympung ha ka lawei ka ban wan khnang ban plie lad ïa ki nongïalehkai ba kin pynpaw ïa ki sap ba kyrpang jong ki,” u la bynrap.
Ha kawei pat ka liang, u President ka AMKA u Bah Hunlang Lytan u la pdiang sngewbha ïa baroh ki nongïalehkai karate sha kane ka lympung. U la pynpaw ka jingsngewnguh ïa ka Sorkar Jylla kaba la kloi ban kyrshan na ka bynta ban kyntiew ïa kane ka jingïalehkai lem bad kiwei ki jingïalehkai ha ka Jylla naduh ki jaka ïalehkai kiba biang, ka baibam na ka bynta ki nongïalehkai bad ki jingpynkup burom ïa ki nongïalehkai kiba wanrah khur takma ïa ka Jylla.
Na ka liang u Sharma u la ai khublei ïa ka AMKA halor ka jinglah ban pynbit pynbiang ïa kane ka lympung kaba heh ha ka thaiñ shatei lammihngi.
Ha kane ka sngi la pynkup burom ruh ïa ki nongïalehkai ka thaiñ shatei lammihngi kiba la mihkhmat ïa ka ri India ha ki lympung ïalehkai shabar ri da u Bah Shylla lem bad u Sharma. Kine ki kynthup ïa u Gideon Tympuiñ bad u Daniel Dabiangbha Warjri, kiba la khur takma ha ka South Asian Karate Championship 2026.
